Atyraý oblysynda kóshi-qon zańnamasyn buzǵan 22 sheteldik ustaldy
Oblystyq polıtsııa departamentiniń baspasóz qyzmetinen málim etkendeı, 22-28 tamyz aralyǵynda «Mıgrant» jedel-profılaktıkalyq is-sharasy ótkizildi.
«Bul jedel is-sharanyń maqsaty – elimizdiń kóshi-qon zańnamasyn buzatyn shetel azamattaryn anyqtaý. Іs-shara kezinde oblys aýmaǵynda 373 shetel azamatyna qatysty QR Ákimshilik quqyqbuzýshylyq týraly kodeksiniń 517-babymen (Sheteldiktiń nemese azamattyǵy joq adamnyń Qazaqstan Respýblıkasynyń halyqtyń kóshi-qony salasyndaǵy zańnamasyn buzýy) ákimshilik hattama toltyryldy. Qazaqstan Respýblıkasynyń aýmaǵynan Ózbekstan Respýblıkasynyń 22 azamaty tysqary shyǵaryldy», -dep habarlady polıtsııa departamentiniń baspasóz qyzmeti.
Sondaı-aq, óńirde ókiletti organdardyń ruqsatynsyz shetel azamattarynyń jumys kúshin zańsyz paıdalanǵan azamattar anyqtalyp otyr. Osyǵan baılanysty Qazaqstan Respýblıkasynyń 19 azamatyna QR Ákimshilik quqyqbuzýshylyq týraly kodeksiniń 519-babymen (Sheteldik jumys kúshin jáne eńbekshi kóship kelýshilerdi Qazaqstan Respýblıkasynyń zańnamasyn buza otyryp tartý) ákimshilik hattama toltyryldy.
Eske sala ketelik, buǵan deıin Atyraýda kóshi-qon zańnamasyn buzǵan 900 sheteldik ákimshilik jaýapqa tartylǵanyn habarlaǵan edik.
Atyraý oblysynda kóshi-qon zańnamasyn buzǵan 1 486 adam ákimshilik jaýapqa tartyldy. Onyń ishinde sheteldik 900 azamat bolǵan.
Sot sheshimimen kóshi-qon zańnamasyn buzǵan 25 sheteldik Qazaqstan Respýblıkasynyń aýmaǵynan shyǵarylǵan edi.
Avtor: Bek Mustafa
