Atyraý oblysynda qorshaǵan ortany búldirgenderge 306 mln teńge aıyppul salyndy
Atyraý oblystyq ekologııa departamentiniń baspasóz qyzmetinen málim etkendeı, byltyr tabıǵat paıdalanýshylarǵa qatysty 121 baqylaý júrgizilgen.
«Baqylaý nátıjesinde ekologııa zańnamasynyń talaptaryn buzǵan 241 derek anyqtaldy. Zań buzýshylarǵa qatysty 230 ákimshilik is qozǵalyp, jalpy somasy 306 635 466,73 teńgeniń ákimshilik aıyppuly salyndy. Qazir jalpy somasy 14 102 722,23 teńgeniń 8 ákimshilik istiń oryndalý merzimi ótken joq. Al, 107 957 847 teńgeniń 7 ákimshilik isi sot oryndaýshylarynyń óndirisinde qaralyp jatyr. Bir ákimshilik is qysqartyldy», -dep habarlady departamenttiń baspasóz qyzmeti.
Tabıǵat paıdalanýshynyń birine jalpy somasy 56 146 400 teńgeni quraǵan zalaldy óteý týraly 1 uıǵarym berilgen. Alaıda, tabıǵat paıdalanýshy ornalasqan mekenjaıy boıynsha Aqtóbe oblysynyń mamandandyrylǵan aýdanaralyq ekonomıkalyq sotyna shaǵym bergen. Sot sheshimimen shaǵym qanaǵattandyrýsyz qaldyrylǵan. Tabıǵat paıdalanýshy sot sheshimimen kelispeı, Aqtóbe oblystyq sotynyń apellıatsııalyq alqasyna apellıatsııalyq shaǵymmen júgingen. Sot sheshimi ózgerissiz qaldyrylyp, apellıatsııalyq shaǵym qanaǵattandyrýdan bas tartylǵan. Qorshaǵan ortaǵa keltirilgen zalal óndirildi.
«Ekologııalyq zańnama talaptaryn buzýǵa jol bergen 8 tabıǵat paıdalanýshy obektileriniń sharýashylyq qyzmetin toqtata turý týraly sot sheshimderi shyǵaryldy. Onyń ishinde mindetti memlekettik ekologııalyq saraptamadan ótip, ruqsat alǵanǵa deıin «Jylyoı Tazalyq» JShS-niń qatty turmystyq qaldyqtar polıgonyn paıdalanýǵa tyıym salý, Jylyoı aýdanynyń Qulsary qalasy men Jańa Qaraton kentindegi býlandyrý alańdaryna (jer bederine) «Jylyoısý» MKK aǵyzatyn sarqyndy sýlardy memlekettik ekologııalyq saraptamanyń qorytyndysynsyz, ekologııalyq ruqsatsyz, sondaı-aq aldyn ala tazartýsyz aǵyzýdy toqtatý týraly sot sheshimi bar. Ekologııalyq ruqsat berý qujattaryn alǵanǵa deıin «Olja» AQ-nyń óndiristik aımaqta ornalasqan avtotsısternanyń gaz quıý qondyrǵysy arqyly emıssııany júzege asyrýdy toqtatý, Jarsýat, Esbol, Kóktoǵaı, Inderbor, Eltaı aýyldyq okrýginiń ekologııalyq ruqsat qujattaryn alǵanǵa deıin qoqys polıgonyn paıdalanýdy toqtata turý týraly talap-aryzdar qanaǵattandyryldy», -dep málim etti departamenttiń baspasóz qyzmetinen.
Eske sala ketelik, buǵan deıin Atyraýdan Reseıge baratyn joldy jóndep jatqan kompanııaǵa aıyppul salynǵanyn jazǵan edik.
Avtor: Bek Mustafa