Atyraý oblysynda qorshaǵan ortaǵa 1 mlrd teńgeniń zalaly kelgen
ATYRAÝ. QazAqparat – Atyraý oblysynda byltyr qorshaǵan ortaǵa 1 mlrd teńgeniń zalaly kelgeni anyqtaldy, dep habarlaıdy QazAqparat.
Bul týraly Atyraý oblysy boıynsha Ekologııa departamentiniń basshysy Álibek Bekmuhametov málim etti.
Onyń aıtýynsha, ekologııalyq zańnamany saqtaýǵa baılanysty 83 tekserý júrgizilip, 91 ákimshilik is qozǵalǵan. Nátıjesinde 73 ákimshilik is boıynsha jalpy somasy 96 017 000 teńgege ákimshilik aıyppul túrinde qaýly shyǵarylyp, jalpy somasy 1 mıllıard teńgeden astam quraıtyn qorshaǵan ortaǵa keltirilgen zalaldy óteý týraly 106 uıǵarym usynylǵan.
«Byltyr «I sanattaǵy obektiler úshin memlekettik ekologııalyq saraptama qorytyndysyn berý» boıynsha 252 memlekettik qyzmet kórsetildi. Onyń ishinde 182 jobaǵa memlekettik ekologııalyq saraptamanyń oń qorytyndysy berilip, 57 jobaǵa ekologııalyq zańnama talaptaryna sáıkes kelmeýine baılanysty teris qorytyndylar berildi. 13 joba aldyn-ala saraptamamen keri qaıtaryldy. «I sanattaǵy obektiler úshin qorshaǵan ortaǵa emıssııalarǵa ruqsat berý» boıynsha 71 qyzmet kórsetildi. 53 ótinishke qorshaǵan ortaǵa emıssııaǵa ruqsat berilip, 15 ótinimge ruqsat berýden bas tartyldy», - dedi Atyraý oblysy boıynsha ekologııa departamentiniń basshysy Álibek Bekmuhametov.
Sondaı-aq, ekologııalyq zańnama buzǵan 244 derek tirkelgen.
Eske sala ketelik, buǵan deıin «Teńizshevroıldan» ekologııalyq zańnamany buzǵany úshin 726 mln-nan astam teńge óndirilgenin habarlaǵanbyz.
