Atyraý oblysynda koronavırýspen aýyrǵan 8 naýqastyń jaǵdaıy aýyr

ATYRAÝ. QazAqparat – «Qyzyl» aımaqtaǵy Atyraý oblysynda koronavırýspen aýyrǵan 8 naýqastyń jaǵdaıy aýyr, dep habarlaıdy QazAqparat.

Oblystyq densaýlyq saqtaý basqarmasy baspasóz qyzmetiniń málimetinshe, koronavırýs ınfektsııasyn juqtyrýshylardyń kóbeıýi epıdemıologııalyq ahýaldy kúrdelendirip otyr.

«Qazir óńirdegi ınfektsııalyq statsıonarlarda 580 tósek-oryn bar. Statsıonarlarda qaýipti vırýsqa shaldyqqan 285 naýqas emdelip jatyr. Mundaǵy júkteme – 49,1%. Infektsııalyq statsıonarlardyń 58 orynǵa eseptelgen jansaqtaý bóliminde jatqan 8 naýqastyń jaǵdaıy nasharlady. Jaǵdaıy óte aýyr 1 patsıent ókpeni jasandy jeldetý apparatyna qosylǵan. Bul bólimdegi júkteme – 15,5%», -dep málim etti basqarmanyń baspasóz qyzmetinen.

Eske sala ketelik, buǵan deıin Atyraý oblysynda koronavırýsqa shaldyqqandar sany kúrt kóbeıgen bolatyn.