Atyraý oblysynda koronavırýsqa test ótkizýge 186,3 mln teńge bólindi
ATYRAÝ. QazAqparat –Atyraý oblysynda koronavırýske PTR-test zertteýin júrgizýge 186,3 mln teńge bólindi, dep habarlaıdy QazAqparat.
«Áleýmettik medıtsınalyq saqtandyrý qory» kommertsııalyq emes aktsıonerlik qoǵamy Atyraý oblystyq fılıaly baspasóz qyzmetiniń málimetinshe, buǵan deıin koronavırýs ınfektsııasyna PTR-zertteýlerge respýblıkalyq bıýdjetten 5,4 mlrd teńge bólingen. Búgingi kúni óńirde osy maqsatqa bólingen qarjy 186,3 mln teńgeni qurap otyr.
«Onyń ishinde statsıonarlarǵa 60,1 mln teńge, al bastapqy medıtsınalyq-sanıtarlyq kómek kórsetý emhanalaryna 126,2 mln teńge bólindi», - deıdi oblystyq fılıal dırektory Sábıt Quralbek.
Onyń aıtýynsha, azamattar testini mekenjaıy boıynsha tirkelgen bastapqy medıtsınalyq-sanıtarlyq kómek kórsetý emhanalarynda joldama arqyly tapsyra alady. Al, jeke tulǵalarǵa «Olımp» klınıkalyq-dıagnostıkalyq zerthanasyna júginýge bolady. Onyń baǵasy – 15400 teńge.
«COVID-19 ınfektsııasyna kúdikti provızorlyq statsıonarǵa jatqyzylǵandar, JRVI jáne pnevmonııa sımptomdary bar azamattar, indet juqtyrǵandarmen jaqyn baılanysta bolǵandar, statsıonarǵa josparly emdeýge jatqyzý kezindegi patsıentter, tynys alý organdarynyń, endokrındik jáne júrek-qantamyr júıeleriniń aýrýlarymen dınamıkalyq baqylaýdaǵy 50 jastan asqan patsıentter, shetelden kelgender, júkti áıelder PTR-testini tegin tapsyra alady», - dedi ol.
Eske sala ketelik, budan buryn Atyraýda Aqkól aýyly karantınge jabylyp, Mııalyda karantın rejımi, Muqyrda shekteý sharalary engizilgen bolatyn. Sondaı-aq, Atyraý qalalyq ákimdiginiń qyzmetkeri koronavırýs juqtyrǵanyn jazǵan bolatynbyz.
