Atyraý oblysynda koronavırýs ınfektsııasynan bir adam qaıtys boldy
ATYRAÝ. QazAqparat – Birneshe kún buryn «jasyl» aımaqqa ótken Atyraý oblysynda koronavırýs ınfektsııasyn juqtyrǵan bir adam qaıtys boldy, dep habarlaıdy QazAqparat.
Oblystyq densaýlyq saqtaý basqarmasynyń baspasóz qyzmetinen málim etkendeı, ótken táýlik – 17 aqpanda 10 adam COVID-19 ınfektsııasyn juqtyrǵan. Atyraý qalasynda qaýipti vırýsqa 4 adamnyń shaldyqqany rastaldy. Teńiz ken ornynda – 3 naýqas, Jylyoı, Inder, Qurmanǵazy aýdandarynyń árqaısysynda 1 naýqastan tirkelgen.
«Qazir 796 adam úı jaǵdaıynda, ınfektsııalyq statsıonarlarda 92 naýqas emdelip jatyr. Onyń ishinde modýldik aýrýhanada – 63, aýdandardaǵy ınfektsııalyq statsıonarlarda – 13, al, №2 oblystyq aýrýhanada – 10, ftızıopýlmanologııalyq ortalyqta 6 adam patsıent oqshaýlanǵan. Ótken táýlikte koronavırýs ınfektsııasyn juqtyrǵan 1 adam qaıtys boldy», -dep habarlady basqarmanyń baspasóz qyzmeti.
Jylyoı aýdanyndaǵy Teńiz ken ornynda ashylǵan ınfektsııalyq statsıonarǵa emdelip jatqan naýqas joq.
Eske sala ketelik, buǵan deıin «sary» aımaqtaǵy Atyraý oblysynda 1 adam koronavırýstan qaıtys bolǵanyn jazǵan edik.
