Atyraý oblysynda koronavırýs ınfektsııasymen kúres qalaı júrdi
Máselen, shildede Atyraý oblysyna júk kóligimen dári-dármektiń iri partııasy jetkizildi.
Dári-dármektiń iri partııasynda koronavırýsqa shaldyqqandardy emdeıtin medıtsınalyq preparattar da boldy.
«Almatydan Atyraýǵa jalpy quny 220 mln teńgeni quraıtyn 470 dári-dármektiń 2 myńnan astam qoraby jetkizildi. Alynǵan preparattardyń ishinde antıbıotıkter men qyzý túsiretin dáriler bar. Bul dári-dármek oblystyń dárihanalaryna búgin-erteń taratylady» dep habarlady óńirlik kommýnıkatsııalar qyzmeti.
Buryn bul óńirge preparattar temirjolmen jetkiziletin. Oǵan 10 kún nemese odan kóp ýaqyt ketetin. Oblys ákimdigi dári-dármekti ushaq jáne júk kóligimen jyldam jetkizýdi uıymdastyrdy.
Al qazan aıynda eki aıda salynǵan modýldi tıptegi ınfektsııalyq aýrýhana ashyldy.
Onyń qurylysyna NCOC kompanııasy demeýshilik jasady. Modýldi aýrýhanadaǵy 8 blok pen 10 qosalqy nysan Germanııanyń «Modex» zaýytynda shyǵarylǵan modýldik temirbetonnan qurastyrylǵan. Ǵımarattyń jalpy aýmaǵy – 8924 sharshy metr. Aýrýhana dıagnostıka men emdeý úshin zamanaýı kompıýterlik tomografpen, sandyq rentgen apparatymen, medıtsınalyq gazdar júıesimen, ÝDZ, EKG, ókpeni jasandy jeldetý apparattary jáne basqalarmen qamtylǵan.
Medıtsınalyq mekemede qaýipsizdik deńgeıi joǵary aqyldy jeldetý júıesi ornatylǵan. Palatalarda ár tósekte medbıkeni shaqyrý túımesi bar. Oqshaýlanǵan bokstarǵa arnaıy chıpter arqyly ǵana kirýge bolady. Munda jergilikti medıtsına qyzmetkerlerimen qatar Grýzııa respýblıkasynan kelgen dárigerler alty aı boıyna jumys isteıdi.
«Eń bastysy, jańa aýrýhana óńirdegi medıtsınalyq kómektiń qoljetimdiligi men sapasyn arttyrýǵa múmkindik beredi», - dedi óńir basshysy Mahambet Dosmuhambetov.
Medıtsınalyq nysanda 56 eki oryndyq, 16 úsh oryndyq, 6 bir oryndyq palata men jeti eki oryndy bokstarda aýlaǵa shyǵatyn arnaıy esik bar. Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, joǵary tehnologııalyq medıtsınalyq jabdyqtardy qospaǵanda, jobany iske asyrý kezinde otandyq materıaldar men taýarlardy paıdalanýǵa basymdyq berilgen. Infektsııalyq aýrýhana 200 tósekke eseptelgen. Onyń ishinde 20 oryn jansaqtaý men qarqyndy terapııa bólimshesine arnalǵan.
«Patsıentterdi emdeý men dıagnostıkalaýǵa qajetti qural-jabdyqtarmen qamtyldy. PTR zerthanasy, rentgen men kompıýterlik tomografııa kabınetteri ashyldy. Dálizge qaýipti ınfektsııanyń taralmaýy úshin palatalardyń ishinde teris qysym jasaıtyn arnaıy sorý-syrtqa taratý jeldetkishimen jabdyqtaldy. Aýrýhana «las» jáne «taza» aımaqtarǵa bólindi. Aýany tereń tazartatyn ORIT súzgi qondyrǵylary ornatyldy. Jedel járdem kólikteri aýrýhana aýmaǵyndaǵy dezınfektsııalaý pýnktinde óńdeýden ótkiziledi. Sondaı-aq, medıtsınalyq qaldyqtardy zararsyzdandyrý stantsııasy iske qosyldy. Reanımatsııa men qarqyndy terapııa bólimsheleri membrana arqyly ótken taza sý óndirý jáne búırek jetkiliksizdigi bar patsıentterge arnalǵan dıalız apparattarymen jabdyqtaldy. Palatadaǵy árbir tósek medıtsınalyq gaz ben ottegi jelisine qosyldy», - deıdi basqarma basshysy Ashan Baıdýálıev.
Aýrýhanada emdelýshilerdiń densaýlyq jaǵdaıyna qashyqtyqtan monıtorıng júrgiziletin avtomattandyrylǵan monıtorıng ortalyǵy jasaqtalǵan. Medıtsına qyzmetkerleri emdelýshilerdiń aýrý tarıhy týraly málimetterdi, saraptamalardy planshetter arqyly almasady. Modýldi ınfektsııalyq aýrýhananyń jobasyn «Aqmol Project» JShS daıyndaǵan. Al qurylysyn «BI-Industrial» JShS eki aıǵa jeter-jetpes mezgilde, ıaǵnı, 18 tamyz-15 qazan aralyǵynda júrgizgen.
Al, oblystyq densaýlyq saqtaý basqarmasynyń bólim basshysy Nına Ospanovanyń aıtýynsha, qazir óńirde 1225 oryndyq ınfektsııalyq statsıonar jumys isteıdi.
«Ekinshi tolqyn bastalar bolsa, ınfektsııalyq oryndar sanyn 1570-ke deıin ulǵaıtý, reanımatsııalyq tósek-oryndy 90 kereýetke deıin jetkizýdi josparlap otyrmyz. Sonyń ishinde Teńiz ken ornynda qosymsha 400 ınfektsııalyq oryn ashý kózdelýde» deıdi Nına Ospanova.