Atyraý oblysynda koreıler ornatqan «Qazaq halqyna myń alǵys!» eskertkishi bar
Qıyr Shyǵystan 85 jyl buryn Qazaqstanǵa kúshtep deportatsııalanǵan koreılerdiń bir toby Atyraý oblysyna qonystanǵan.
Olardyń alǵash taban tiregen orny – Mahambet aýdanyndaǵy Beıbarys aýyly. Bul aýyl buryn Chkalov atalǵan edi.
Elimiz táýelsizdik alǵannan keıin ataýy ózgerdi.
Budan bes jyl buryn «Thonıl» koreı etno-mádenı birlestigi Beıbarys aýylynda «Qazaq halqyna myń alǵys!» sózi jazylǵan eskertkish ornatýǵa uıytqy boldy.
Birlestik jetekshisi Lıýdmıla Lıdiń aıtýynsha, bul eskertkish – qıyn kezeńde jatsynbaı, baýyryna basqan qazaq halqyna sheksiz rızashylyqtyń belgisi.
«Koreıler qazaq jerinde ósip-ónip jatyr. Qazir Atyraý oblysynda úsh myńǵa jýyq koreı etnosynyń ókili turady. Koreıler jergilikti turǵyndarmen qyz alysyp, qyz berisken qudandaly bolyp otyr. «Thonıl» etnomádenı birlestigin quryp, tilimiz ben salt-dástúrimizdi jańǵyrtyp kelemiz. Birlestik músheleri óńirdegi mádenı-kópshilik sharalarǵa belsendi qatysyp júr», -deıdi Lıýdmıla Lı.
