Atyraý oblysynda qorada jınaýly turǵan 50 býma shóp janyp ketti

ATYRAÝ. QazAqparat – Atyraý oblysynda bir keshte eki qoradaǵy 50 rýlon shóp janyp ketti. Bir qorada 40, al ekinshisinde 10 rýlon jınalyp turǵan, dep habarlaıdy QazAqparat tilshisi.

Oblystyq tótenshe jaǵdaılar departamentiniń qoǵammen baılanys tobynan málim etkendeı, órttiń ekeýi de keshe, 16 tamyzda bolǵan.

«Keshe saǵat 18:36-da Qurmanǵazy aýdanynyń ortalyǵy – Qurmanǵazy aýylynda M. Qabdolqyzy kóshesinde turǵyn úıdiń qorasyndaǵy 40 rýlon órtendi. Qysqy mal azyǵy aýmaǵy 20h10 metrlik qorada jınaýly turǵan. Órttiń saldarynan turǵyn úıdiń 8h10 metr syrtqy polıfassad qaptamasy balqyp ketti», - dep habarlady departamenttiń qoǵammen baılanys tobynan.

Órt saǵat 19:27-de oqshaýlanyp, saǵat 20:03-te joıyldy.

Sol kúni taǵy bir órt tirkeldi. Túngi saǵat 22:33-te Jylyoı aýdanyndaǵy Maıkómgen aýylynda qorada jınaýly turǵan 10 rýlon shópti jalyn sharpydy.

«Turǵyn úıdiń aýlasyndaǵy qora shpaldan salynǵan. Jalynnyń saldarynan aýmaǵy 20h20 metrlik qora da, onyń ishindegi 10 rýlon shóp te janyp ketti», -dep málim etti qoǵammen baılanys tobynan.

Jalyn búgin, 17 tamyzda saǵat 00:13-te oqshaýlanyp, saǵat 01:33-te sóndirildi.

«Oblys turǵyndaryna órt qaýipsizdigi erejesin qatań saqtaýdy eskertemiz. Óıtkeni, adam ómirine qaýip tóndiredi. Sol sebepten, osy kezge deıin qutqarýshylar órt qaýipsizdigi talaptaryn túsindirý, órttiń jáne tótenshe jaǵdaılardyń aldyn alý, boldyrmaý maqsatynda 26 440 jeke turǵyn úıge baryp, 78 897 turǵynǵa 79 289 dana jadnama taratty», - dep habarlady qoǵammen baılanys toby.

Eske sala ketelik, buǵan deıin Atyraý oblysynda 159 órt tirkelip, 2 adam qaza tapqanyn jazǵan edik.