Atyraý oblysynda kópshilik is-sharalardy ótkizý toqtatylady

ATYRAÝ. QazAqparat – Atyraý oblysynda «Ashyq» jobasyna qatysatynyna qaramastan birneshe nysannyń jumysy, onyń ishinde kópshilik is-sharalardy ótkizý toqtatylady, dep habarlaıdy QazAqparat.

Bul týraly oblystyń bas sanıtar dárigeri Mádenıet Tanaýovtyń jańa qaýlysynda aıtylǵan.

«Kópshilik is-sharalardy (merekelik, kópshilik mádenı is-sharalardy, kórmelerdi, korporatıvterdi, forýmdardy, konferentsııalardy, sondaı-aq otbasylyq, estelik is-sharalardy (banketter, úılený toılary, mereıtoılar, eske alý jáne t. b.), onyń ishinde úıde jáne jappaı adamdar jınalatyn ózge de is-sharalardy ótkizý, oıyn-saýyq obektileriniń, banket zaldarynyń, jabyq úı-jaıdaǵy, sonyń ishinde qoǵamdyq tamaqtaný obektilerindegi attraktsıondardyń, oıyn alańdarynyń (aýladaǵylardy qospaǵanda), kalıan, túngi klýbtardyń, merekelerdi uıymdastyrý boıynsha qyzmet kórsetý toqtatylsyn», - delingen jańa qujatta.

Sondaı-aq, marafondar, kórermendermen sporttyq is-sharalardy ótkizýge, ashyq aýadaǵy attraktsıondardyń barlyq túrleriniń jumysyna (demalys saıabaqtarynda, alańdarda), alańdardaǵy, saıabaqtardaǵy, skverlerdegi, jaǵalaýdaǵy balalardyń, eresekterdiń jyljymaly oıyn quraldarynyń usaq bólshek saýdasyna, jalǵa berýge tyıym salynǵan.

Jańa qaýly qol qoıylǵan sátinen bastap kúshine enedi.

Qaýlynyń tolyq mátinimen myna siltemeden tanysýǵa bolady.

Eske sala ketelik, buǵan deıin Atyraý qalasynda karantın shekteýi kúsheıtilgen bolatyn.