Atyraý oblysynda kópqabatty turǵyn úıdiń ornyna sport kesheni salynady
Jylyoı aýdandyq qurylys bóliminiń basshysy Qazbek Aǵyraevtyń aıtýynsha, jańa sport kesheni Qulsary qalasynda boı kóteredi.
«Qulsary qalasynyń 1-shaǵyn aýdanyndaǵy №27 kópqabatty turǵyn úı memleket qajettiligi úshin alyndy. Turǵyn úıdegi 60 páterdiń ıesine zańǵa sáıkes ótemaqy tólendi. Qazir turǵyn úı ǵımaratyn buzý jumysy júrip jatyr. Endi buzylyp jatqan turǵyn úıdiń ornynda sport kesheni salynady», - dep habarlady Qazbek Aǵyraev.
Onyń aıtýyna qaraǵanda, jańa dene shynyqtyrý-saýyqtyrý kesheniniń jobasy daıyn tur. Nysannyń jalpy aýmaǵy – 1615,9 sharshy metr.
«Qurylysty júrgizý úshin mlekettik satyp alý zańyna sáıkes konkýrs jarııalandy. Konkýrstyń jeńimpaz bolyp «GradStroıServıs» JShS tanyldy. Merdiger mekeme josparǵa sáıkes sport kesheniniń qurylysyn jyl sońyna deıin aıaqtaýy tıis. Jańa sport kesheninde kishi fýtbol, boks, kúres, voleıbol zaly qarastyrylǵan», - dep málim etti Qazbek Aǵyraev.
Eske sala ketelik, buǵan deıin Qulsary qalasynda sport kesheni bar 3 myń oryndyq stadıon ashylǵanyn habarlaǵan edik. Stadıonnyń qurylysy 2020 jyly bastalǵan. Bul – aýmaǵy 4,7 myń sharshy metr bolatyn tolyqtaı jabdyqtalǵan sport kesheni. Stadıonnyń syıymdylyǵy 3 myń adamǵa eseptelgen. Oǵan qosymsha salynǵan sport kesheninde qysqy maýsymda túrli matchtar men oıyndar ótkizýge arnalǵan jabyq stadıon men basseın bar.
