Atyraý oblysynda kópbalaly áıeldi pyshaqtap óltirgen jigit 10 jylǵa sottaldy

Atyraý oblysynyń qylmystyq ister jónindegi mamandandyrylǵan aýdanaralyq sotynda adam óltirý deregine qatysty qylmystyq is qaraldy. Sottalýshyǵa QR Qylmystyq kodesiniń 99-babynyń 1-bóligimen aıyp taǵylǵan.
«2021 jyldyń naýryz aıynda sottalýshy Z. jábirlenýshi A.-nyń ótinishi boıynsha óz atyna bankterden birneshe ret nesıe rásimdegen. Jábirlenýshi nesıeni ózi óteıtinine ýáde bergen. Alaıda, keıin ol nesıelerdi tóleýden múldem bas tartyp, taraptar arasynda kelispeýshilik týyndaǵan. Qarasha aıynda sottalýshy jábirlenýshimen kezdesip, oǵan pyshaqpen birneshe ret soqqy jasap, oqıǵa ornynan qashyp ketken. Alǵan aýyr dene jaraqattary saldarynan jábirlenýshi sol jerde qaıtys bolǵan. Basty sot talqylaýynda sottalýshy Z. kinásin tolyq moıyndap, jasaǵan áreketine ókindi», -dep habarlady oblystyq sottyń baspasóz qyzmeti.
Sottalýshynyń kinási tıisti aıǵaqtarmen, sondaı-aq, saraptama qorytyndylarymen jáne beınejazbalarmen dálelin tapqan. Prokýror sottalýshyǵa 10 jylǵa bas bostandyǵynan aıyrý túrindegi jaza taǵaıyndaýdy surady.
«Sot úkimin shyǵarý kezinde jazany aýyrlatatyn mán-jaılar anyqtalǵan joq. Jazany jeńildetetin mán-jaılar retinde sottalýshynyń ókinýi, óz erkimen kelýi, otbasylyq jaǵdaıy tanyldy. Sot sottalýshy Z.-ny QR Qylmystyq kodeksiniń 99-babynyń 1-bóligimen kináli dep tanyp, oǵan 10 jyl bas bostandyǵynan aıyrý túrindegi jazany taǵaıyndady», -dep málim etti sottyń baspasóz qyzmeti.
Sot úkimi zańdy kúshine engen joq.
Eske sala ketelik, budan buryn Atyraý oblysynda urlyqqa kúdiktini uryp-soqqan eki polıtseı sottalǵanyn jazǵan edik.