Atyraý oblysynda kolledj stýdentteri úshin 12 jataqhana salynady
ATYRAÝ. QazAqparat - Atyraý oblysynda kolledj stýdentterine arnalyp 12 jataqhana salynady, dep habarlaıdy QazAqparat tilshisi.
«Qazirgi tańda Atyraý oblysynyń 25 kolledjinde 17 myń bilim alýshy bar. 10 kolledj 722 orynǵa arnalǵan jataqhanalarmen jabdyqtalǵan, alaıda 1450 stýdent baspanaǵa muqtaj. Dál qazir óńirde jańa jataqhanalardyń qurylysy júrip jatyr. Atap aıtqanda, «D. Nurpeıisova atyndaǵy halyqtyq mýzyka akademııasy» Atyraý mýzykalyq kolledjinde 100 oryndyq jáne Isataı aýdanyna qarasty Aqqystaý aýylyndaǵy kásiptik-tehnıkalyq kolledjde 100 orynǵa arnalǵan jataqhanalar salynyp jatyr. Atyraý energetıka jáne qurylys kolledjiniń 100 oryndyq jataqhanasyna jáne Atyraý agrarlyq-tehnıkalyq kolledji stýdentteri úshin 150 oryndyq jataqhanaǵa arnalǵan jobalyq-smetalyq qujatattama ázirlendi», - dedi oblystyq Bilim basqarmasynyń basshysy Qaıyrǵalı Kenjeǵalıev.
Q. Kenjeǵalıevtiń aıtýynsha, oblystyń segiz kásiptik-tehnıkalyq bilim mekemelerine arnalǵan 960 oryndyq jataqhanalardyń qurylysyna jobalyq-smetalyq qujattamany daıyndaý jumystary júrip jatyr.
