Atyraý oblysynda kólik júrgizýshisi jylyjaı ashty
ATYRAÝ. QazAqparat - Atyraýdaǵy Isataı aýdanynda turatyn kólik júrgizýshisi Ǵadiljan Balmoldın óziniń jeke jylyjaıyn ashty, dep habarlaıdy QazAqparat tilshisi.
Ol «Bıznes-keńesshi» qysqa merzimdi kýrsyn oqyp, jylyjaı sharýashylyǵyn qolǵa aldy. Jalpy, Ǵadiljan Balmoldınniń negizgi mamandyǵy - júrgizýshi.
«Jasym elýden asyp, balalardyń aldy eńbekke jaraı bastaǵanda, bir otbasyna bir kásiptiń kerek ekenin uǵyndym», - deıdi ol.
Isataı aýdany boıynsha jalpy 2 jylyjaı tirkelgen bolsa, sonyń biri - Qamysqala aýyldyq okrýginde salynǵan «Jaına-Bek» jylyjaıy. Jumysyn bastaǵanyna az ýaqyt bolsa da, kásipker otbasy múshelerimen birge jylyjaıda tynbaı eńbek etýde. Negizinen qııardyń «gýnnar» atty tuqymyn ósiretin kásipker búginde 300 keliden astam ónim alypty. Alynǵan ónimniń negizgi tutynýshysy - aýyl halqy.
«Buryn-sońdy aýlaǵa baqsha salyp kórgenimiz joq. Mamandyǵymyz da bul saladan emes. Biraq, adam balasy bir isti ynty-shyntysymen qolǵa alsa, onyń túbine jetpeı qoımaıdy eken. Osy isti bastaǵanymyzǵa az ýaqyt bolsa da, etken eńbektiń jemisi men jeńisinen dám tatatyn kún jaqyndaı túskendeı. Alǵashynda qıyndaý boldy. Osydan 2 jyl buryn «Bıznes keńesshi» qysqa merzimdi kýrsyn oqyp, sertıfıkatym qolyma tıgen soń «Aýylsharýashylyǵyn qarjylaı qoldaý qory» AQ Atyraý oblystyq fılıalynan nesıe alýdyń jumysymen kóp júgirgenim ras. Biraq, degenime jetip, ótken jyldyń sońynda qolyma 5 mıllıon teńge qarjy aldym. Endi 6 aı úzilis jasap, 4 jylda osy aqshany qaıtarýym kerek. Sol úshin jatpaı-turmaı eńbek etýimiz kerek», - deıdi kásipker Ǵ.Balmoldın.
