Atyraý oblysynda kólik túıeni qaǵyp ketti: 3 adam qaza tapty
ATYRAÝ. QazAqparat – Atyraý oblysynda jeńil avtokólik jolda kele jatyp, túıeni qaǵyp ketken. Qaza tapqandar men zardap shekkender bar, dep habarlaıdy QazAqparat tilshisi.
Jol-kólik oqıǵasy Eskene kentiniń mańyndaǵy Atyraý-Aqtaý avtojolynda oryn aldy. «Jıgýlı» avtokóliginiń rólinde 1997 jyly týǵan qala turǵyny bolǵan. Kólik joldan ótip bara jatqan túıeni qaǵyp, aýdarylyp qalǵan. Kólik júrgizýshisi men eki jolaýshy oqıǵa ornynda kóz jumdy. Taǵy eki adam ártúrli jaraqat alyp, oblystyq aýrýhanaǵa jatqyzyldy.
Polıtsııa departamentiniń baspasóz qyzmeti habarlaǵandaı, jol apaty deregi boıynsha QR QK 345-babyna sáıkes sotqa deıingi tergeý júrip jatyr.
Jyl basynan beri oblys aýmaǵynda 117 jol-kólik oqıǵasy tirkelgen. Saldarynan 24 adam kóz jumǵan.
