Atyraý oblysynda kólik aýdarylyp, eki adam mert boldy
ATYRAÝ. QazAqparat – Atyraý oblysynda kólik aýdarylyp, eki adam mert boldy. Taǵy bir jolaýshy aýrýhanaǵa jetkizildi, dep habarlaıdy QazAqparat.
Oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy búgin, 31 tamyzda bolǵan.
«Búgin 31 tamyzda tańǵy saǵat 04:20 shamasynda «Dossor-Qulsary-Aqtaý» baǵytyndaǵy respýblıkalyq tas joldyń 74-shaqyrymy tusynda Toyota avtokóligi aýdaryldy. Kólikte júrgizýshiden basqa eki jolaýshy bolǵan. Jol-kólik oqıǵasynyń saldarynan eki adam oqıǵa ornynda kóz jumdy. Onyń biri – 1984 jylǵy júrgizýshi, al, ekinshisi – 31 jastaǵy jolaýshy. Taǵy bir jolaýshy – 1988 jyly týǵan er adam Jylyoı aýdandyq ortalyq aýrýhanasyna jetkizildi», -dep habarlady polıtsııa departamentiniń baspasóz qyzmeti.
Ázirge Toyota avtokóliginiń aýdarylýyna ne sebep bolǵany belgisiz. Jylyoı aýdandyq polıtsııa bóliminiń qyzmetkerleri jol-kólik oqıǵasyna qatysty tergeý júrgizýdi bastady.
Polıtsııa qyzmetkerleri jol-kólik oqıǵasynyń jıi tirkeletinine alańdaýshylyq bildirip otyr. Máselen, patrýldik polıtsııa batalonynyń komandıri Dáýren Násıpollanyń aıtýynsha, jyl basynan beri tek Atyraý qalasynyń aýmaǵynda 93 jol-kólik oqıǵasy tirkelgen. Jol apatynan 95 adam ártúrli dene jaraqatyn alsa, 7 adam qaza tapqan.
«Atyraý qalasynda bir kúnde eki kóliktiń elektr baǵanasyna soqtyǵysý deregi tirkeldi. Máselen, 39 jastaǵy júrgizýshi mas kúıde Exeed LX avtokóliginiń rýline otyryp, tańǵy saǵat 06:00 shamasynda Ǵ.Abdrahmanov kóshesindegi 2 elektr baǵanasyna soqtyǵysty. Al, M.Ótemisuly kóshesinde dál osyndaı jol-kólik oqıǵasyna 1993 jylǵy júrgizýshi Daewoo Gentra avtokóligimen ushyrady», -deıdi Dáýren Násıpolla.
Eske sala ketelik, budan buryn Atyraý oblysynda 7 aıda jol apatynan 49 adam qaıtys bolǵanyn https://kaz.inform.kz/news/atyrau-oblysynda-7-ayda-zhol-apatynan-49-adam-koz-zhumdy_a3962655 habarlaǵan edik.
