Atyraý oblysynda qıyrshyq tas tıelgen vagondar relsten shyǵyp ketti

ATYRAÝ. QazAqparat – Atyraý oblysynda qıyrshyq tas tıelgen úsh júk vagony relsten shyǵyp ketti, dep habarlaıdy QazAqparat tilshisi.

Óńirlik kommýnıkatsııalar qyzmetiniń málimetinshe, oqıǵa búgin, 18 qazanda jergilikti ýaqytpen saǵat 11:15-te bolǵan.

«Maqat aýdanyndaǵy Dossor stansasynda «Dossor Processing Company» jaýapkershiligi shekteýli seriktestigine tıesili toǵyz vagonnyń úsheýi relsten shyǵyp ketti. Júk vagondaryn súıregen teplovoz Maqat stansasynan Dossor stansasy baǵytyna jolǵa shyqqan. Júk poıyzyndaǵy toǵyz vagonnyń bárine qıyrshyq tas tıelgen. Bul oqıǵa ózge poıyzdardyń kestemen qozǵalýyna keri áserin tıgizbedi», - delingen habarlamada.

Temirjol boıyndaǵy oqıǵadan zardap shekkender joq.

Eske salaıyq, qazan aıynyń basynda Atyraý oblysynda tórt júk vagony relsten shyǵyp ketken bolatyn.