Atyraý oblysynda kitaphanalyq resýrstardy sandyq formatqa kóshirý máselesi talqylanýda
ATYRAÝ. QazAqparat - Búgin Ǵ.Slanov atyndaǵy Atyraý oblystyq ǵylymı ámbebap kitaphanasynda Elbasy Nursultan Nazarbaevtyń «Bolashaqqa baǵdar: Rýhanı jańǵyrý» baǵdarlamalyq maqalasyn júzege asyrý sheńberinde «Kitaphanadan aǵartý ortalyqtaryna: jańǵyrýdyń jańa múmkindikteri» atty respýblıkalyq forým bastaldy, dep habarlaıdy QazAqparat tilshisi.
Kitaphana basshysy Sara Іzmuhambetovanyń aıtýynsha, búgingi forýmnyń maqsaty - kitaphanalardy damytýdyń jańashyl joldaryn qarastyrý, qıyndyqtardy sheshýdiń jańa múmkindikterin zerdeleý. Forýmda kitaphanalar jumysyn jańǵyrtýdyń ózekti máseleleri, kitaphana mamandarynyń kásibı deńgeıi men zamanaýı kelbeti, kitaphanalyq resýrstardy sandyq formatqa kóshirý, aýyl kitaphanalaryn jańǵyrtý maqsatynda jasalýy tıis jumystar týraly oılar qozǵalyp, pikirler aıtyldy.
Forým jumysyna QR Ulttyq akademııalyq kitaphanasy basshysynyń mindetin atqarýshy N.Joldybalınov, sonymen qatar Mańǵystaý, Aqtóbe, Batys Qazaqstan jáne Ońtústik Qazaqstan oblystarynyń, Atyraý qalasy jáne aýdandarynyń kópshilik kitaphana qyzmetkerleri jáne kolledj, lıtseı kitaphanashylary, zııaly qaýym ókilderi qatysýda.
Shara aıasynda kitaphanalardy jańǵyrtýdyń úzdik tájirıbeleri men olardy aǵartý ortalyqtaryna aınaldyrýdyń joldary týraly pikirler talqylanyp, sheberlik synyptary, trenıngter men kezdesýler arqyly jańa bilim alýdyń múmkindikteri qarastyryldy.
Sondaı-aq, is-shara aıasynda sektsııalyq májilisterinde Nazarbaev zııatkerlik mektebi men «Bilim-Innovatsııa» oblystyq lıtseıiniń ǵımaratynda trenıngter men debattar uıymdastyryldy. Eki kúnge sozylǵan forým aıasynda qatysýshylar kıeli Saraıshyq eldi mekeni men oblystyq mýzeılerge saıahat jasaıdy.
Abaı Aqmurzıev
