Atyraý oblysynda keıingi eki aıda 4 jol apatynan 20 adam mert bolǵan
Oblystyq polıtsııa departamentiniń baspasóz qyzmetinen málim etkendeı, jeńil jáne aýyr júk kólikter aǵynynyń artýymen jol apaty kóbeıgen.
«Atyraý oblysyndaǵy respýblıkalyq joldarda sońǵy eki aıda 4 iri jol-kólik oqıǵasy tirkeldi. Jol apatynan 20 adam qaza tapty. Jol-kólik oqıǵalarynyń basty sebebi – júrgizýshilerdiń jol júrý erejesin saqtamaýy, qarsy baǵytqa shyǵý, jyldamdyqty asyrý. Sol sebepten, jol-kólik oqıǵalarynyń aldyn alý úshin patrýldik narıadtar shyǵaryldy. Alaıda, joldyń patrýldik polıtsııa narıadtary kezdespeıtin tusynda kólik apaty jıi tirkelip otyr», -dep habarlady departamenttiń baspasóz qyzmeti.
Eske sala ketelik, buǵan deıin Atyraý oblysynda eki kólik soqtyǵysyp, 7 adam mert bolǵanyn habarlaǵanbyz.
Dossor-Qulsary-Beıneý baǵytyndaǵy tasjolda Chevrolet Cobalt avtokóligi joldyń qarsy jolaǵyna shyǵyp, Toyota Ipsum avtokóligimen túıisken. Jol-kólik oqıǵasynyń saldarynan Chevrolet Cobalt kóliginiń júrgizýshisi men 4 jolaýshysy, Toyota Ipsum kóliginiń júrgizýshisi men 1 jolaýshysy qaza tapty. Al, 2 jolaýshy túrli dene jaraqatymen Jylyoı aýdandyq aýrýhanasyna túsken.
Sondaı-aq, KamAZ-ben soqtyǵysqan jeńil kóliktiń 3 jolaýshysy mert bolǵanyn jazǵan edik.
Atyraý-Inder jolynda Toyota Camry men KamAZ júk kóligi soqtyǵysty. Jol-kólik apatynan Toyota Camry avtokóliginiń 3 jolaýshysy – anasy men 1 jáne 15 jastaǵy qyzdar kóz jumǵan. Jeńil kóliktiń júrgizýshisi aýrýhanaǵa jetkizildi. Olar – Batys Qazaqstan oblysynyń turǵyndary.
