Atyraý oblysynda kedergige tap bolǵan kásipkerler Antıkorǵa shaǵymdandy
Sybaılas jemqorlyqqa qarsy is-qımyl agenttiginiń Atyraý oblystyq departamenti basshysynyń ýaqytsha mindetin atqarýshy Erulan Serikqalıevtiń aıtýynsha, «Bızneske jol» jobasy aıasynda 5 kásipkerdiń quqyǵy qorǵalǵan.
«Atalǵan jobanyń maqsaty – kásipkerlerdiń qujattardy resimdeý kezinde ártúrli ákimshilik kedergilerge tap bolmaýyna kómektesý. Bıylǵy jyl basynan 5 kásipkerdiń quqyǵy qorǵaldy. Máselen, «QazTransGazAımaq» Atyraý óndiristik fılıalynyń laýazymdy tulǵalary jeke kásipkerdiń jyljymaıtyn múlkin gazǵa qosý úshin kelisimshartqa 2021 jyldan beri qol qoımaı kelgen. Buǵan qosa múliktiń burynǵy ıesiniń bereshegin jabýdy zańsyz talap etken. Taǵy bir kásipkerge kólik salyǵyn negizsiz tóletpek bolǵan. Osyndaı kedergige tap bolǵan kásipkerler bizdiń departamentke shaǵymmen júgindi», - dedi Erulan Serikqalıev.
Onyń deregine súıensek, Qurmanǵazy aýdanyndaǵy kásipkerge ortalyq aýrýhana basshylyǵy azyq-túlik jetkizgeni úshin 1 mıllıonnan astam teńgeni tóleýden bas tartqan.
«Departament qyzmetkerleriniń jedel aralasýynyń nátıjesinde osyndaı kedergilerdiń bári oń sheshimin tapty. Monopolıst kásiporyn jeke kásipkermen gazben jabdyqtaýǵa shartty qaıta jasady, múliktiń burynǵy ıesiniń qaryzy óndirilmeıtin boldy. Kólik úshin negizsiz salyq ta tólenbeıdi. Al aýdandyq aýrýhanadan kásipkerdiń esepshotyna tıisti qarjy aýdaryldy», - dep málim etti Erulan Serikqalıev.
Eske sala ketelik, buǵan deıin Atyraýda jumysshylarynyń jalaqysyn bermeı qoıǵan dırektor 3,5 jylǵa sottalǵanyn jazǵan edik.
