Atyraý oblysynda qatty jel shatyrlardy ushyryp áketti
Keshe, 28 naýryzda 112 qyzmetinen óńir turǵyndaryna «29 naýryzda kúndiz Atyraý oblysynyń shyǵysynda, batysynda jáne ortalyǵynda shańdy daýyl kútiledi. Ońtústik-batystan, batystan jel soǵady. Oblystyń basym bóliginde kúndiz jel ekpini sekýndyna 23-28 metrge jetedi» degen habar kelgen edi.
Oblystyq tótenshe jaǵdaılar departamentiniń baspasóz qyzmetinen málim etkendeı, búgin, 29 naýryzda jergilikti ýaqytpen saǵat 16:00-ge deıin birneshe ret shatyrlar ushqan.
«Búgin ekpini sekýndyna 22-28 metrge jetken qatty jel soǵyp tur. Qatty jeldiń saldarynan 7 turǵyn úı men 2 balabaqshanyń shatyryn ushyryp áketti. Máselen, Atyraý qalasynda 6 turǵyn úıdiń shatyry men qabyrǵa qaptamasy búlindi. «Nursaıa» shaǵynaýdany men Aqjar kentindegi «Aqbóbek» balabaqshasynyń shatyry ushty. Al, Maqat aýdanynyń ortalyǵy – Maqat kentindegi kóp qabatty turǵyn úıdiń shatyryna ishnara zaqym keldi», -dep habarlady departamenttiń baspasóz qyzmeti.
Qatty jeldiń zardabyn joıyp, turǵyndarǵa jedel kómek kórsetý úshin departamenttiń 20 qutqarýshysy men 4 tehnıka jumyldyryldy.
Eske sala ketelik, budan buryn Atyraý oblysynda kólikteri batpaqqa batqan birneshe adam qutqarylǵanyn jazǵan edik.
