Atyraý oblysynda qatty jel mektep shatyryn ushyryp áketti
ATYRAÝ. QazAqparat – Atyraý oblysynda qatty jel mektep shatyryn ushyrdy, dep habarlaıdy QazAqparat.
Oblystyq tótenshe jaǵdaılar departamenti baspasóz qyzmetiniń málimetinshe, keshe, 22 shildede qatty jelden Qarabaý orta mektebiniń shatyry búlingen.
«Keshe jeldiń uıytqýy sekýndyna 20-23 metrge jetti. Qatty jeldiń saldarynan saǵat 16:39 mınýt Qyzylqoǵa aýdanynyń Qarabaý aýylyndaǵy orta mekteptiń shatyry ushyp ketti. Búlingen aýmaqtyń jalpy aýdany 100 sharshy metrdi qurady» -dep habarlady departamenttiń baspasóz qyzmeti.
Belgili bolǵandaı, bul mektep 1978 jyly salynǵan. Mektepke 2019 jyly kúrdeli jóndeý júrgizilgen.
Eske sala ketelik, buǵan deıin Atyraý oblysynda surapyl jel úsh mekteptiń shatyryn ushyrǵanyn habarlaǵan bolatynbyz.
