Atyraý oblysynda Kaspıı jaǵalaýynan balyqtyń qyrylǵan orny tabyldy
Jaıyq-Kaspıı oblysaralyq balyq sharýashylyǵy basseındik ınspektsııasynyń málimetine súıensek, búgin, 1 qyrkúıekte balyqtyń qyrylǵan orny tabylǵan.
«Bıylǵy 29 tamyzda Tik-Tok jelisindegi vıdeoda sýdyń keri qaıtýy saldarynan balyqtyń qyrylǵany kórsetilgen. Vıdeo avtorynyń aıtýynsha, Kaspıı teńiziniń soltústik bóliginde balyqtar qyrylǵan. Bul fakt týraly jergilikti atqarýshy organdar, balyq sharýashylyǵy ǵylymı-zertteý uıymdary, oblystyń veterınarııalyq qyzmeti, ekologııa jáne polıtsııa departamentteri, tabıǵat qorǵaý prokýratýrasyna habarlandy. Sol kúni balyqtyń qyrylýy múmkin oryndardy anyqtaý maqsatynda Kaspıı teńiziniń jaǵalaýyn zertteýge Jaıyq-Kaspıı oblysaralyq balyq sharýashylyǵy basseındik ınspektsııasynyń qyzmetkerleri jiberildi. Budan soń 30-31 tamyzda ınspektorlyq quram baqylaýdaǵy akvatorııanyń edáýir bóligin avtomobıl jáne áýe kóligimen tekserdi. Al, 1 qyrkúıekte Kaspıı teńiziniń soltústik-shyǵys bóligindegi «Jılaıa kosa» ýchaskesiniń janyndaǵy jaǵalaýdan 4 shaqyrym qashyqtyqta balyqtyń qyrylǵan orny anyqtaldy», - dep habarlady atalǵan ınspektsııadan.
Osyǵan baılanysty 2 qyrkúıekte ekologııa jáne polıtsııa departamentteriniń, veterınarııalyq qyzmettiń jáne jergilikti atqarýshy organdardyń qyzmetkerleri bar jumys toby sý, topyraq jáne óli balyqtan synamalar alýdy kózdep otyr. Bul úshin qyrylǵan balyq tabylǵan jerge barady.
«Qazgıdromettiń málimetinshe, 2022 jyldyń 18-23 tamyzy aralyǵynda Kaspıı teńiziniń sýy 5-25 shaqyrymǵa deıin keri qaıtqan. Bul balyqtyń ólimine sebep bolǵan. Qosymsha aqparat keıin habarlanatyn bolady», -dep málim etti Jaıyq-Kaspıı oblysaralyq balyq sharýashylyǵy basseındik ınspektsııasynan.
Eske sala ketelik, budan buryn Atyraý oblysynda batpaqaı balyǵy qyrylǵan tusty tikushaqpen izdep jatqanyn jazǵan edik.
