Atyraý oblysynda kásipkerlikti qoldaýǵa 8 mlrd teńge bólindi
Basqarma basshysynyń mindetin atqarýshy Nurbol Jańabekovtiń aıtýynsha, kásipkerlikti qoldaý baǵytyndaǵy memlekettik baǵdarlamalarǵa qatysýshylar sany 3 ese artqan. Qazir oblysta 60 795 shaǵyn jáne orta kásipkerlik sýbektisi tirkelgen.
«Bıyl Atyraý oblysynda kásipkerlikti damytýdyń ulttyq jobasy sheńberinde bıýdjetten 8 mlrd teńge bólinip otyr. Bul – ótken jylmen salystyrǵanda 23 paıyzǵa kóp. Onyń ishinde nesıeniń paıyzdyq mólsherlemesin sýbsıdııalaýǵa 6 mlrd teńge, nesıeni kepildendirýge 1,9 mlrd teńge, memlekettik granttar usynýǵa 106 mln teńge berildi. Qazir 76 kásipkerdiń jobasy qarjylandyryldy», - deıdi Nurbol Jańabekov.
Onyń aıtýynsha, aýyl kásipkerlerin qoldaý maqsatyndaǵy óńirlik baǵdarlamany iske asýǵa jergilikti bıýdjetten 2013-2022 jyldarǵa 3 mlrd 357 mln teńge qaralǵan. Sonyń nátıjesinde 531 joba qarjylandyrylyp, 718 jańa jumys orny quryldy. Bıyl bul baǵytqa 500 mln teńge bólingen.
Óńirde «Jumyspen qamtýdyń jol kartasy» baǵdarlamasyna ótken jyly ulttyq qordan 1 mlrd teńge bólingen edi. Qazir nesıe somasy 510 mln teńge bolatyn 40 kásipkerdiń jobasy qarjylandyryldy. Aldaǵy ýaqytta olar 46 jańa jumys ornyn ashýdy josparlap otyr.
Aıta keteıik, Atyraý oblysynda jyl basynan beri 4 923 adam jumysqa ornalasqanyn habarlaǵan edik.