Atyraý oblysynda kásipkerlik nysandarynyń sany 50 myńnan asty
Bul týraly oblys ákimi Mahambet Dosmuhambetovtiń tóraǵalyǵymen ótken jıynda belgili boldy.
Oblystyq ekonomıka jáne bıýdjettik josparlaý basqarmasynyń basshysy Azamat Sálimbaevtyń málim etýinshe, ótken jyly óńirdegi shaǵyn jáne orta kásipkerlik sýbektileriniń sany 50 239-ǵa jetken.
«Byltyr pandemııa jaǵdaıyna qaramastan óńirde shaǵyn jáne orta kásipkerlik sýbektileriniń ósimi baıqaldy. Ásirese olardyń sany oblys ortalyǵynda, Inder men Qyzylqoǵa aýdanynda artty. Sondaı-aq, 55,7 myń tonna et, 64,7 myń tonna sút óndirilip, aýyl sharýashylyǵy óniminiń qory ósti. Budan bólek, múıizdi iri qara, qoı men eshki, jylqy, túıe sany artyp otyr», - deıdi Azamat Sálimbaev.
Onyń aıtýynsha, ótken jyly 24 044 jańa jumys orny qurylǵan. Onyń ishinde 15 400 turaqty jumys orny bar.
«Jumyspen qamtý ortalyǵy arqyly 25 myńǵa jýyq adam eńbekke aralasty. Qoǵamdyq jumysqa 6 357 adam ornalastyrylsa, 663 adam áleýmettik jumystarǵa, 16 817 adam vakantty jumys oryndaryna jáne 1 081 túlek jastar tájirıbesine jiberildi. Al, «Eńbek» baǵdarlamasynyń baǵyttarymen 29 231 adam qamtyldy», - deıdi ekonomıka jáne bıýdjettik josparlaý basqarmasynyń basshysy Azamat Sálimbaev.
Oblys ákimi Mahambet Dosmuhambetov jumyssyzdyqtyń aldyn alý máselesine basa mán berip, osy baǵyttaǵy baǵdarlamalardyń oryndalýyn qadaǵalaýdy tapsyrdy.
«Bıyl jumyssyzdyq deńgeıin 4,9 paıyzdan asyrmaý baǵytynda naqty sharalar qabyldaý qajet. Turaqty jumys oryndaryn qurý josparyna sáıkes, 12 800-den asyrǵan jón. Sonymen qatar shaǵyn jáne orta kásipkerlik boıynsha nysanaly kórsetkishterge qol jetkizýdi, salaǵa qatysty obektilerdiń ýaqytyly paıdalanýǵa berilýin qadaǵalaýdy tapsyramyn», - dedi Mahambet Dosmuhambetov.
Oblystyq kásipkerlik basqarmasynyń basshysy Ábdýahıt Ábishevtiń aıtýynsha, bıyl 800 mln teńgeniń alty jobasyn iske asyrý josparlanyp otyr.
«Óńirdiń ónerkásip óndirisi men ınvestıtsııa kólemin arttyrý – asa mańyzdy. Azyq-túlik qaýipsizdigin qamtamasyz etý úshin aýyl sharýashylyǵy salasyna qoldaý jasalady. Aýyl sharýashylyǵy basqarmasy men Atyraý qalasynyń ákimine áleýmettik mańyzy bar azyq-túlik taýarlarynyń baǵasyna turaqty monıtorıng júrgizýdi tapsyramyn. Turaqtandyrý qory arqyly alynǵan ónimdermen qala jáne aýdan ortalyqtaryndaǵy iri saýda oryndary qamtamasyz etilýi kerek», - dedi oblys ákimi.
