Atyraý oblysynda kásipkerlerdi qoldaýǵa 4,9 mlrd teńge bólingen

ATYRAÝ. QazAqparat – Bıyl Atyraý oblysynda kásipkerlerdi qoldaýǵa 4,9 mlrd teńge kóleminde qarajat bólingen, dep habarlaıdy QazAqparat.

Bul týraly Atyraý oblysynyń ákimi Mahambet Dosmuhambetov jergilikti kásipkerlermen kezdesýde málim etti.

Kezdesýde bıznesti qoldaý men qorǵaý baǵytyndaǵy ózekti máselelerdi talqylandy.

Aımaq basshysy aldymen shaǵyn kórmege qoıylǵan kólik dóńgelekterin qaıta óńdeıtin «New Eco City» JShS, jylyna 40 mln medıtsınalyq maska shyǵaratyn «Doktor Haýs» JShS, jylyna 10 myń tonna jýý quraldaryn óndiretin «MAGICan» JShS, jylyna 20 tonna antıseptık ónimderin shyǵaratyn «SARI Suppliers» JShS, jylyna 600 myń kg sút ónimderin óndiretin «Óz sút» JShS ónimderi men taýarlarymen tanysty.

Budan soń bıznes salasy ókilderimen áńgimelesip, shaǵyn jáne orta kásipkerlikti qoldaýǵa árqashan basymdyq beriletinin alǵa tartty.

«Prezıdent tapsyrmasyna sáıkes, «Bızneske arnalǵan úkimet» jobasy júzege asyryldy. Qazir kásipkerlerge bir ǵımarat ishinen birneshe qyzmet túrin kórsetý, bızneske qatysty aqparattyq-túsinik, keńes berý múmkindigine qol jetkizildi. Jyl saıyn oblysta jumys istep turǵan shaǵyn jáne orta kásipkerlik sýbektileriniń sany artyp keledi. Osy salada jumyspen qamtylǵandar sany 127,2 myń adamdy qurady»,- dedi Mahambet Dosmuhambetov.

Memlekettik baǵdarlamalar jáne qabyldanyp jatqan sharalar kásipkerliktiń damýyna oń serpin berip otyr. Bıyl osyndaı memlekettik jáne óńirlik baǵdarlamalar sheńberinde kásipkerlerdi qoldaýǵa 4,9 mlrd teńge kóleminde qarajat bólinip, 5 myńǵa jýyq kásipkerlik sýbektisi kómek aldy. Nátıjesinde 3371 jumys orny saqtalyp, jańadan 680 jumys orny qurylmaq.

Ekonomıkany turaqtandyrý jáne bıznesti qoldaý úshin salyqtyq yntalandyrý maqsatynda óńirde aldyn-ala taldaý júrgizilgen. Nátıjesinde jekelegen sanatqa kiretin 20 833 kásipkerlik sýbektisine 5,8 mlrd. teńge kóleminde salyqtyq jeńildikter qarastyrylǵan.

Jyl basynan beri memlekettik organdar men qarjy ınstıtýttary ókilderiniń qatysýymen oblysta 300-ge jýyq qatysýshysy bar 7 kezdesý ótkizilgen.

Esk sala ketelik, buǵan deıin eksport kólemi 758 mln dollarǵa jetken edi.

https://kaz.inform.kz/news/atyrau-oblysynda-eksport-kolemi-758-mln-dollarga-zhetti_a3733085