Atyraý oblysynda Kásipkerler forýmy ótti
ATYRAÝ. QazAqparat - Atyraý oblystyq forýmynda bıznes pen atqarýshy bılik ókilderi ózara is-qımyl jasaý jáne oryn alǵan kedergilerdi joıý máselelerin talqylady dep habarlaıdy QazAqparat Atyraý oblysynyń Óńirlik kommýnıkatsııalar qyzmetine silteme jasap.
Forým Atyraý oblysy ákimdiginiń, Memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblysy boıynsha departamentiniń, Atyraý oblystyq Kásipkerler palatasynyń qoldaýymen uıymdastyryldy. Forým jumysyna QR Kásipkerlik quqyqtary jónindegi ýákili Bolat Palymbetov qatysty.
Atyraý oblysynyń ákimi Nurlan Noǵaev forým qatysýshylaryn quttyqtap, mundaı kezdesýlerdi ótkizýdiń mańyzdylyǵyn atap ótti jáne kásipkerler qaýymdastyǵy men atqarýshy bıliktiń arasyndaǵy dıalog birqatar problemalyq máselelerdi sheshýge, kómektesetinine senim bildirdi.
«Memleket Basshysy Nursultan Nazarbaev kásipkerlikti damytýǵa, shaǵyn jáne orta bıznesti qoldaýǵa úlken mańyz berip otyr. Mundaı kezdesýler bizge tikeleı qarym-qatynas jasaýǵa, kásipkerlik salasyndaǵy eń ózekti máselelerdi kóterýge múmkindik beredi. Forýmǵa Kásipkerlik quqyqtary jónindegi ýákildiń qatysýy osy is-sharanyń mańyzdylyǵyn kórsetedi»,- dedi Nurlan Noǵaev.
Oblys ákiminiń aıtýynsha, Atyraý oblysynda kásipkerlikti qoldaý baǵytynda kóptegen jumystar atqarylýda. Bul memleket tarapynan qarjylaı kómek qana emes, barlyq qajetti memlekettik qyzmetterdi tıisti deńgeıde kórsetý.
«Kásipkerlikti damytý elimizdiń ekonomıkasy úshin memlekettiń mańyzdy basymdylyǵy bolyp qalýda. Sońǵy bes jylda jergilikti bıýdjettiń ózinen ǵana óńir kásipkerligin damytýǵa 1,2 mlrd teńge bólindi. 2018 jyly bıýdjetten 500 mln teńge bólindi, onyń basym bóligi aýyldaǵy bıznesti damytýǵa arnaldy. Atyraý oblysyn munaıly óńir retinde esepteıdi. Alaıda, sońǵy jyldary biz ekonomıkany ártaraptandyrýda, agroónerkásiptik keshendi damytýda, ónimderdi qaıta óńdeýde aıtarlyqtaı jumystar atqardyq, - dep atap kórsetti Nurlan Noǵaev.
Óńir basshysy ekinshi deńgeıdegi bankter men aýyl kásipkerleri áriptestiginiń kúrdeligin atap ótti. Kóptegen aýyl turǵyndary úshin nesıe alý kezindegi kepil máselesi shamasy kelmeıtin mindet bolyp qalýda. Osyny eskerip, jergilikti atqarýshy organdardyń kúshimen aýyl bıznesine shaǵyn nesıe berý úshin birqatar biregeı baǵdarlamalar iske asyrylýda. 2017 jyly «Bıznes Aımaq» baǵdarlamasy boıynsha jergilikti bıýdjetten 350 mıllıon teńge bólindi, sonyń arqasynda 67 bıznes joba iske asyrylyp, 123 jumys orny quryldy. «Altyn Keme»
baǵdarlamasy boıynsha 304 mıllıon teńge somasyna 13 joba maquldandy, 25 jumys orny quryldy. Sondaı-aq 2017 jyly Atyraý oblysynda «Bıznestiń jol kartasy 2020» baǵdarlamasy boıynsha 1 543,5 mln.teńge bólindi. Jalpy alǵanda 312 joba qarjylandyrylyp, 1210 jumys orny quryldy.
Forýmda sóz sóılegen bıznes-ombýdsmen Bolat Palymbetov kásipkerlerdiń máselelerine toqtaldy.
«Sońǵy eki jylda kásipkerlerdiń quqyqtaryn qorǵaý jóninde 12 420 ótinish tústi, Atyraý oblysy boıynsha 378 ótinish. Osy problemalardyń 90% óńirlik sıpatta ekenin atap ótken jón - bular jer alý, qurylys máseleleri. Olar jergilikti jerlerde sheshilýi tıis. Bul týraly biz jergilikti atqarýshy organdardyń ókilderimen kezdesýler kezinde aıtamyz, - dedi Bolat Palymbetov.
Bıznes-ombýdsmen jergilikti atqarýshy organdarǵa jer ýchaskelerin satyp alý protsesi týraly tıisti aqparatty jarııalap otyrý qajettiligin atap kórsetti.
Oblys ákimi Nurlan Noǵaev, óz kezeginde osy máseleni sheshý úshin óńirde atqarylyp jatqan isterge toqtaldy.
«Kásipkerlermen kezdesýler kezinde ruqsat berý qujattaryn berý, sonyń ishinde jer máseleleri boıynsha problemalyq máseleler kóteriledi. Qazir biz elektrondyq geoportal qurýdamyz, sol arqyly osy máselelerdiń barlyǵy elektrondyq formatta sheshiletin bolady jáne bul jer ýchaskelerimen jumys protsesin ashyq etedi», - dep sendirdi óńir basshysy.
