Atyraý oblysynda káriz sýyn dalaǵa tókken kásiporynǵa eki ret aıyppul salyndy
ATYRAÝ. QazAqparat – Atyraý oblysynda káriz sýyn dalaǵa tókken kásiporynǵa eki ret aıyppul salyndy, dep habarlaıdy QazAqparat tilshisi.
Atyraý oblystyq ekologııa departamenti baspasóz qyzmetiniń málimetinshe, «Jylyoı sý» MKK-nyń káriz sýyn tazalamaı dalaǵa tógip kelgen.
«Bıyl maýsym aıynda Sybaılas jemqorlyqqa qarsy is-qımyl agenttiginiń Atyraý oblysy boıynsha departamentimen birge Jylyoı aýdanynda ornalasqan «Jylyoı sý» MKK-ǵa tekserý júrgizilip, káriz sýyn Qulsary qalasynyń shetki aımaǵyna tazalaýsyz jáne ruqsatsyz tókkenin anyqtaldy. Osyǵan baılanysty Atyraý oblysy tabıǵı resýrstar jáne tabıǵat paıdalanýdy retteý basqarmasynan shara qabyldaý týraly hat tústi», -dep habarlady departamenttiń baspasóz qyzmeti.Ekologııa departamentiniń mamandary «Jylyoı sý» MKK-ǵa jospardan tys tekserý júrgizdi. Tekserý nátıjesi hatta kórsetilgen derekterdi rastady.
«Anyqtalǵan zań buzýshylyqtarǵa qatysty QR Ákimshilik quqyq buzýshylyq týraly kodeksiniń 331-baby jáne 328-babymen ákimshilik quqyq buzýshylyq týraly hattamalar toltyryldy. Іs qujattary «Jylyoı sý» MKK-nyń aryzy negizinde Jylyoı aýdandyq sotyna qaraýǵa joldandy. Sottyń 8 tamyzdaǵy qaýlysymen «Jylyoı sý» MKK-ǵa ákimshilik quqyq buzýshylyq jasaǵany úshin kináli dep tanylyp, 1 380 000 teńge, 1 qyrkúıektegi qaýlysymen 272 871 871 teńge ákimshilik aıyppul salyndy», -dep málim etti departamenttiń baspasóz qyzmetinen.Eske sala ketelik, buǵan deıin Teńiz ken ornynda aýaǵa normadan artyq 425 tonna zııandy zat shyǵarylǵanyn habarlaǵan edik.
