Atyraý oblysynda qaraýsyz maldyń kesirinen 76 jol-kólik oqıǵasy tirkeldi
Jergilikti polıtsııa qyzmeti basqarmasynyń aǵa ınspektory, polıtsııa maıory Amanjol Jumalıevtyń aıtýynsha, tórt túliktiń kesirinen bolatyn jol-kólik apaty respýblıkalyq mańyzy bar joldarda tirkelip otyr.
«Atyraý oblysynyń aýmaǵynda jyl basynan beri qaraýsyz júrgen mal 76 jol-kólik oqıǵasynyń tirkelýine sebepker boldy. Osyndaı 8 jol apatynan 6 adam ártúrli dene jaraqatyn aldy. Tek qyrkúıek aıynda maldyń kesirinen 27 jol-kólik oqıǵasy tirkeldi. Onyń ishinde 9 oqıǵa oblystyq mańyzy bar Atyraý-Inder tas jolynda, al, 18 derek respýblıkalyq mańyzy bar tas joldarda bolǵan. Máselen, 26 qyrkúıek kúni saǵat 00:30 shamasynda Nissan Teana kóligi Oral-Atyraý tasjolynda jylqyǵa soqtyǵysqan. Jol-kólik oqıǵasynyń saldarynan 1988 jylǵy júrgizýshi Atyraý oblystyq aýrýhanasyna jetkizildi», -deıdi Amanjol Jumalıev.
Onyń aıtýyna qaraǵanda, turǵyndar óz ıeligindegi maldy qaraýsyz qaldyrmaýy qajet. Al, júrgizýshiler kólik jyldamdyǵyn shekten tys asyrmaǵany jón.
«Jol-kólik oqıǵasyna baılanysty júrgizýshi kináli dep tanylsa QR Ákimshilik quqyqbuzýshylyq týraly kodeksiniń 610-babymen ákimshilik hattama toltyrylyp, is sotqa joldanady. Al, mal ıesi kináli bolsa, atalǵan qujattyń 408-babynyń 2-bóligimen ákimshilik jaýapkershilikke tartylyp, búlingen avtokóliktiń materıaldyq shyǵynyn túgel óteıdi», -dep málim etti Amanjol Jumalıev.
Eske sala ketelik, budan buryn Atyraýda jyl basynan beri jol apatynan 53 adam mert bolǵanyn jazǵan edik.
Foto: static.dir.bg