Atyraý oblysynda karantındik shekteýler nege kúsheıtildi
ATYRAÝ. QazAqparat –Atyraý oblysynda karantındik shekteýler kúsheıtildi, dep habarlaıdy QazAqparat.
Buǵan deıin 12 qazanda saǵat 00:00-den bas Atyraý oblysy aýmaǵynda karantındik sharalar kúsheıtilgen edi. Óńirde karantındik sharalardyń kúsheıtilýine sońǵy aptada aýrýshańdyqtyń eki ese joǵarylaýy sebep bolyp otyr. Atyraý oblysynyń Bas memlekettik sanıtarlyq dárigeri Asylbek Sharovtyń karantındik sharalar oblys aýmaǵynda epıdemıologııalyq ahýal turaqtanǵanǵa deıin jalǵasady.
«Ókinishke qaraı, sońǵy 14 kúnde koronavırýs juqtyrǵandar sany qaıta óse bastaǵany baıqalady. Máselen, 28 qyrkúıek pen 4 qazan aralyǵynda indet juqtyrýdyń 5 jaǵdaıy tirkelgen bolsa, 5 qazan-11 qazan aralyǵynda 43 jaǵdaı anyqtalyp otyr. Osyǵan sáıkes, indettiń aldyn alý sharalary uıymdastyrylyp, karantın talaptary kúsheıtildi», - deıdi Asylbek Sharov.
Qaýlyǵa sáıkes, atyraýlyqtarǵa alańdarda, saıabaqtarda, skverler men jaǵalaýlarda bir otbasy múshelerin qospaǵanda, 3 adamnan aspaı toptasyp júrýge ruqsat etilgen. Sondaı-aq, turǵyndarǵa qoǵamdyq oryndarda, qoǵamdyq transportta, halyqqa qyzmet kórsetý jáne demalýǵa arnalǵan ǵımarattarda, ashyq aýada medıtsınalyq maska kııý mindettelip otyr.
«Budan bólek, qoǵamdyq tamaqtaný obektileriniń naqtyraq aıtqanda, kafe, meıramhana jáne basqalarynyń jumys ýaqyty saǵat 08:00-den 22:00-ge deıin qysqartyldy. Kelýshiler sany jabyq ǵımarattarda 30 adamnan, ashyq alańdarda 50 adamnan aspaı, keminde 2 metr áleýmettik qashyqtyqty jáne kúsheıtilgen sanıtarlyq-dezınfektsııalyq rejımdi saqtaýy tıis», - dedi oblystyń Bas memlekettik sanıtarlyq dárigeri Asylbek Sharov.
Eske sala ketelik, budan buryn Atyraý oblysynda karantındik shekteý sharalary uzartylyp, ózen tramvaıy men fıtnes-ortalyqtar toqtatylǵanyn, demalys kúnderi bazarlar jumys istemeıtinin jazǵan edik.
