Atyraý oblysynda qant baǵasyn negizsiz ósirýge baılanysty 6 shaǵym túsken
Oblystyq kásipkerlik jáne týrızm basqarmasynyń bólim basshysy Nurdaýlet Jumasıtovtiń málimetinshe, aldaǵy aıda 680 tonna qant jetkizý úshin Almaty oblysyndaǵy «Kóksý qant zaýyty» JShS jáne «Azyq-túlik kelisim shart» UK» AQ-men kelissóz júrgizilip jatyr.
«Atyraý oblysyna mamyr-maýsym aılarynda atalǵan mekemelermen 1 200 tonnadan astam qant tasymaldandy. Qazir qant qorynyń azaıýyna baılanysty aldaǵy bir aıǵa 680 tonna qant aldyrý úshin kelisimshart jasaqtaý jumystary júrgizilip jatyr. Josparǵa sáıkes shilde aıynda óńirge taǵy da qant tasymaldana bastaıdy. Óńirdegi sýpermarketterde qant baǵasy – 495-527 teńge aralyǵynda», - deıdi Nurdaýlet Jumasıtov.
Onyń aıtýynsha, kásipkerler áleýmettik mańyzy bar taýarlardyń kóterme baǵasyna 15 paıyzdan artyq ústeme aqy qosa almaıdy. Ústeme baǵa atalǵan paıyzdan joǵary bolý faktisi tirkelgen jaǵdaıda kásipkerlerge ákimshilik aıyppul salynady.
«Eger tutynýshy qant nemese basqa áleýmettik mańyzy bar azyq-túlik baǵasynyń negizsiz kóterilgenin baıqasa, qalalyq nemese aýdandyq ákimdikke saýda jasaǵan túbirtekti ótkizip, aryz túsire alady. Túbirtekte dúkenniń mekenjaıy, ónim ataýy men baǵasy kórsetilýi tıis. Mundaı jaǵdaıda kásipkerge QR Ákimshilik quqyqbuzýshylyq týraly kodeksiniń 204-babynyń 4-tarmaǵy boıynsha aldymen eskertý, keıin 30 000 - 900 000 teńge aralyǵynda aıyppul salynady», - deıdi Nurdaýlet Jumasıtov.
Osy kezge deıin oblys boıynsha baǵany negizsiz ósirgen kásipkerlerge qatysty alty shaǵym túsken.
«Bul shaǵymdar nazarǵa alynyp, 1 kásipkerlik sýbektisine qatysty tekseris júrgizildi. Al, qalǵan 5 aryz boıynsha tekserý júrgizýge qaýly daıyndalyp jatyr. Ákimdik ókilderi turǵyndardan shaǵym túsken jaǵdaıda ǵana tekserý jumystaryn júrgize alady. Saýda núktelerine 15%-dan joǵary ústeme baǵa qosqany úshin tıisti shara alý múmkindigi bar», - dep túsindirdi basqarmanyń bólim basshysy.
Eske sala ketelik, budan buryn Atyraý oblysyna 536 tonna áleýmettik mańyzy bar azyq-túlik jetkiziletinin habarlaǵan edik.
