Atyraý oblysynda qansha sheteldik azamat eńbek etedi
B.Nurymbetov QR Premer-Mınıstriniń orynbasary Berdibek Saparbaevtyń Atyraý oblysyna jumys sapary aıasynda «Bolashaq-Atyraý» JShS munaı-gaz óńdeý zaýytynyń basshylyǵymen jáne eńbek ujymymen kezdesti. Onyń barysynda mınıstr sheteldik jumys kúshin tartatyn kásiporyndar eńbek zańnamasyn buzýǵa jol bermeýi jáne jalaqy tóleýde teń jaǵdaılardy qamtamasyz etýi tıistigin qadap aıtty.
«Іshki eńbek naryǵyn qorǵaý maqsatynda sheteldik mamandardy respýblıkaǵa tartý úshin jyl saıyn kvota belgilenedi. 2019 jylǵa arnalǵan kvota 48,7 myń birlik mólsherinde bekitildi (jumys kúshine 0,54%). 2019 jylǵy 1 qyrkúıektegi jaǵdaı boıynsha, jergilikti atqarýshy organdar sheteldik jumys kúshin tartýǵa 18 myń 533 ruqsat berdi jáne uzartyldy. Sheteldikterdi jumysqa 2425 kompanııa tartýda, onda 531 myń qazaqstandyq azamat nemese qyzmetkerlerdiń jalpy sanynyń 96% jumys isteıdi. Mınıstrlik Bas prokýratýramen birlesip 50-den astam sheteldik qyzmetkerlerdi tartatyn kásiporyndardy tekserýge bastamashylyq jasady. Aǵymdaǵy jylǵy 8 qazandaǵy jaǵdaı boıynsha 49 kásiporynǵa tekseris júrgizý aıaqtaldy, eńbek jáne kóshi-qon zańnamasyn buzýdyń 791 faktisi anyqtaldy, onyń ishinde 24 kásiporynda eńbekaqy tóleý jáne syıaqy tóleý boıynsha sáıkessizdiktiń 476 faktisi anyqtaldy. Máselen, Atyraý oblysynda «Neftestroıservıs LTD» JShS-da saǵattyq tarıftik mólsherleme jergilikti ınjenerge 568 teńge, al sheteldik qyzmetkerge 6500 teńge kóleminde taǵaıyndaldy. Mundaı tájirıbege jol berilmeıdi! Jumys berýshiler Qazaqstan azamattary men sheteldik qyzmetkerlerge teń eńbek jaǵdaıyn qamtamasyz etýi tıis», – dedi Birjan Nurymbetov.
Eńbek, áleýmettik qorǵaý jáne kóshi-qon komıtetiniń málimeti boıynsha, jyldyń basynan bastap Atyraý oblysynda 364 jumys berýshi 9 myńnan astam sheteldik azamatty jumysqa tartqan, onyń ishinde birinshi sanatqa (basshylar men olardyń orynbasarlary) - 63 (0,7%), ekinshisi sanatqa (qurylymdyq bólimder basshylary) – 1 475 (16,5%), úshinshi sanatqa (mamandar) – 5 332 (59%), tórtinshi sanatqa (bilikti jumyskerler) 1 146 (13%) adam qabyldanǵan. Sondaı-aq maýsymdyq jumyskerlerdiń sany – 910 (10.11%), ishki korporatıvtik negizde aýystyrylǵandar - 78 (1%) adam.
«Sondaı-aq, respýblıka boıynsha tekserý barysynda sheteldik qyzmetkerlerdiń berilgen ruqsatqa nemese jasalǵan eńbek shartyna sáıkes kelmeıtin mamandyq boıynsha jumys atqarýynyń 183 faktisi anyqtaldy. Júrgizilgen jumys nátıjeleri boıynsha 447 ruqsat keri qaıtaryldy. Anyqtalǵan tártip buzýshylyq faktileri boıynsha jumys berýshilerge 50 uıǵarym berilip, 33,7 mln teńgeden astam somaǵa 83 ákimshilik aıyppul salyndy», –dep tolyqtyrdy Birjan Nurymbetov.
Munaı jáne gaz óńdeý zaýytynyń eńbek ujymymen kezdesýden keıin mınıstr «№3 arnaıy áleýmettik qyzmet kórsetý ortalyǵy» KMM-ge baryp, «Venera» ınklıýzıvti damytý ortalyǵynyń jumysymen tanysty.
Sonymen qatar, ol «Atameken» UKP-nyń aımaqtyq fılıalynda bolyp, Nátıjeli jumyspen qamtý jáne jappaı kásipkerlikti damytýdyń «Eńbek» memlekettik baǵdarlamasyn iske asyrý aıasynda jumyspen qamtýǵa járdemdesýdiń belsendi sharalaryna tartylǵan atyraýlyqtarmen kezdesti. Óz isin ashýǵa mıkrokredıtter men granttar alǵan kásipkerler mınıstrge ózderiniń jetistikteri týraly aıtyp berdi.
Birjan Nurymbetov kezdesýge qatysýshylardy Memleket basshysynyń Qazaqstan halqyna Joldaýynda aıtylǵan tapsyrmasy boıynsha, QR Eńbek jáne halyqty áleýmettik qorǵaý mınıstrliginiń kópbalaly jáne tabysy tómen otbasylardy bızneske tartýdyń memlekettik baǵdarlamasynyń tetikterin jetildirýge baǵyttalǵan usynystarymen tanystyrdy.
Budan buryn vedomstvo basshysy Atyraý oblysynyń turǵyndaryna QR Prezıdenti Qasym-Jomart Toqaevtyń Qazaqstan halqyna Joldaýynyń negizgi baǵyttaryn túsindirip, ataýly áleýmettik kómek kórsetýdiń jańa tetikteri týraly áńgimelegen edi.
