Atyraý oblysynda kanal sýyna qulaǵan eki balanyń biri mert boldy

ATYRAÝ. QazAqparat – Atyraý oblysynda oınap júrgen eki bala kanal sýyna qulap ketti. Olardyń biri mert boldy, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń aqparatyna sáıkes, oqıǵa 14 naýryzda Qurmanǵazy aýdanynyń Birlik aýylynda bolǵan.

Sol kúni túngi saǵat 21:20-da Birlik aýylynda oınap júrgen balalardyń ekeýi kanal sýyna qulap ketken. Sonyń saldarynan 10 jastaǵy bala sýǵa batyp, kóz jumǵan. Al 7 jasar balany aýyl adamdary qutqaryp alǵan.

Qutqarylǵan bala aýdandyq ortalyq aýrýhanaǵa jetkizilgen. Dárigerler onyń jaǵdaıyn aýyr dep baǵalap otyr.

Vedomstvonyń baspasóz qyzmetinen málim etkendeı, qazir atalǵan derekke baılanysty tergep-tekserý amaldary júrip jatyr.

Eske salaıyq, budan buryn Atyraýda Jaıyq ózeniniń muzy oıylyp, sýǵa batqan er adam qutqarylǵanyn habarlaǵan edik.

Keıin joldy qysqartpaq bolǵan áıel Jaıyq ózeninde muz astyna túsip ketkenin jazǵan bolatynbyz. Balyqshylar Jumysker shaǵynaýdany mańynda ózen astyna 1 adamnyń túsip ketkenin kórgen. Qutqarýshylarǵa habar berip, ózderi sýǵa batqan adamdy qutqarýǵa umtylǵan. Jedel jetken qutqarý jasaǵynyń qutqarýshylary men jedel kezekshi áıeldi sýdan alyp shyqty. Alǵashqy medıtsınalyq kómek kórsetilgennen keıin ol oblystyq aýrýhanaǵa jetkizildi.