Atyraý oblysynda kadrlardy táýelsiz sertıfıkattaý jobasy engiziledi
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, pılottyq jobany «Edil-Oral.kz» seriktestigi iske asyrady.
«Bıylǵy aqpanda táýelsiz sertıfıkattaý júıesin engizý úshin Eńbek jáne halyqty áleýmettik qorǵaý, Ǵylym jáne joǵary bilim, Oqý-aǵartý mınıstrlikteri, Atyraý oblysynyń ákimdigi men «Edil-Oral.kz» JShS arasynda yntymaqtastyq pen ózara is-qımyl týraly kelisimge qol qoıyldy. Osy baǵyttaǵy jumystardy uıymdastyrý úshin munaı-gaz servıstik salasyndaǵy 25 mekememen «ARES Petrochnic» kolledjinde iskerlik jıyn ótti. Jıynda seriktestik ókilderi 16 mamandyqty sertıfıkattaýdy usyndy. Bul júıeni júzege asyratyn oqý oryndary anyqtalyp, seriktes jumys berýshiler belgilendi», - dep habarlady Azamat Mámbetov.
Onyń aıtýynsha, táýelsiz sertıfıkattaý júıesin engizýmen qatar, «Bilim berý júıesinde kásiptik standarttardy qoldaný» jobasy da pılottyq rejımde iske asady. Osyǵan oraı birlesken jumys toby qurylyp otyr.
«Pılottyq joba iske qosylǵannan keıin «Edil-Oral» seriktestigine óndiristik mekemelerdiń jumysshylary men kásiptik bilimi bar jumyssyzdar ótinim bere alady. Ótinim bergender sertıfıkattaý boıynsha qosymsha bilim alady. Budan soń, kásibı daǵdysy naqtylanyp, táýelsiz sertıfıkatqa ıe bolady. Bul óńirde joǵary sanattaǵy jumysshylar qatary artyp, halyqaralyq deńgeıdegi sertıfıkatty ıelenýine yqpal etedi», - dep málim etti Azamat Mámbetov.
Eske sala ketelik, budan buryn Túrik kásipkeri zaýyt salý úshin Atyraý oblysy ákiminen jer telimin suraǵanyn habarlaǵan edik.
