Atyraý oblysynda iz-túzsiz joǵalyp ketken balyqshylar tabyldy
Buǵan deıin Atyraý oblysynda joǵalyp ketken 4 balyqshyny tikushaqpen izdep jatqanyn jazǵan bolatynbyz.
Oblystyq Tótenshe jaǵdaılar departamenti baspasóz qyzmetinen málim etkendeı, «Amangeldi» jáne «SefKaspııfısh» JShS-niń 4 balyqshysy 3 qarashada balyq aýlaýǵa shyǵyp, iz-túzsiz joǵalyp ketken.
Balyqshylardy izdeý keshe, 6 qarasha kúni bastaldy. Oǵan «MI-8» tikushaǵy tartyldy. Tikushaqpen aerovızýaldy izdestirý jumystary 270 shaqyrym qashyqtyqta, Kaspıı teńiziniń Isataı, Qurmanǵazy aýdandary aýmaǵyndaǵy jaǵalaýynda júrgizilgen.
«Búgin, 7 qarasha saǵat 9:30-da joǵalǵan balyqshylar uıaly baılanys arqyly ózderi jumys isteıtin seriktestik basshylaryna habarlasqan. Balyqshylar Isataı aýdanyndaǵy Janbaı aýylynan 50 shaqyrym qashyqtyqta balyq aýlap júrgenin aıtqan», - dep habarlady departamenttiń baspasóz qyzmetinen.
