Atyraý oblysynda iz-túzsiz joǵalǵan 24 jastaǵy jigitti izdeý toqtatyldy
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, 24 jastaǵy jigit 20 qarashada iz-túzsiz joǵalyp ketken.
Qyzylqoǵa aýdanyndaǵy Jambyl aýyldyq okrýgine qaraıtyn Qarakól aýylynda turǵan jigit saǵat 5:00-de úıinen shyǵyp ketken. Sodan beri odan esh derek bolmaı tur.
Joǵalǵan jigittiń qaı baǵytqa ketkenin eshkim kórmegen. Alǵashqy kúni ony izdestirýge tótenshe jaǵdaılar departamenti men Qyzylqoǵa aýdandyq polıtsııa bóliminen, jergilikti atqarýshy organ men týystarynan 37 adam tartylǵan. Іzdeý jumystary tórt kún qatarynan júrgizilip, keıin toqtatylǵan.
«Habar-osharsyz ketken jigitti izdeý úshin 30 qarashada jergilikti ýaqytpen saǵat 9:52-de «QazAvıaQutqarý» AQ-nyń «Evrokopter» tikushaǵy tartylǵan edi. Tikushaq bortynda 7 adam boldy. Biraq, áýeden barlaý arqyly izdeý esh nátıje bergen joq», - dep habarlady departamenttiń qoǵammen baılanys tobynan.
Qutqarýshylar joǵalǵan jigitti jazyq daladan, saı-jyralardan, qaraýsyz qalǵan qystaqtar men ózge de jerlerden izdestirdi. Biraq, nátıje bolmaǵandyqtan, izdeý jumystary toqtatyldy. Endi qaıta jalǵasa ma, joq pa, ázirge belgisiz.
Eske sala ketelik, buǵan deıin Atyraý oblysynda 24 jastaǵy jigit izdestirilip jatqanyn, keıin joǵalǵan jigitti izdeýge tikushaq tartylǵanyn habarlaǵan edik.
