Atyraý oblysynda iz-túzsiz ketken kólik júrgizýshisi aman-esen tabyldy
ATYRAÝ. QazAqparat – Atyraý oblysynda joǵalyp ketken kólik júrgizýshisi aman-esen tabyldy, dep habarlaıdy QazAqparat.
Budan buryn Atyraý oblysynda janarmaı tasıtyn kóliktiń 27 jastaǵy júrgizýshisi joǵalyp ketkenin jazǵan edik.
Oblystyq tótenshe jaǵdaılar departamenti baspasóz qyzmetiniń málimetine súıensek, júrgizýshi 12 aqpanda Maqat aýdanyna barý úshin kóligimen jolǵa shyqqan.
«Arna» JShS júrgizýshisi Maqat aýdanyndaǵy «Qaratal» ken ornyna barmaq bolǵan.
Alaıda, 14 aqpanǵa deıin ken ornyna jetpegeni anyqtalǵan.
Sol sebepten, ony 14 aqpan kúni túnde bastalǵan izdestirýge №8 órt sóndirý bóliminen 3 qyzmetkeri men 1 «ÝAZ» kóligi men týystary shyqty.
Al, sol kúni tańerteń saǵat 06:20-da jedel-qutqarý jasaǵynyń 3 qutqarýshysy men 1 «TREKOL» jol talǵamaıtyn kóligi, «Arna» JShS-niń 3 qyzmetkeri men 1 tehnıka, sondaı-aq, týystarynan 13 tartyldy.
Keıin «Qaratal» ken ornyna taıaý mańǵa Qazavıaqutqarý» AQ-na qarasty MI-8 tikushaǵymen áýeden sholý jasaldy.
Oǵan ekıpajdyń 4 múshesi, tótenshe jaǵdaılar departamentiniń 3 qyzmetkeri, týystarynan 3 adam qatysty.
«Qutqarýshylar janarmaı tasıtyn kóligimen joǵalyp ketken júrgizýshini 14 aqpanda jergilikti ýaqytpen saǵat 17:12-de Maqat aýdanyndaǵy Dossor kentinen tapty. Júrgizýshiniń aıtýynsha, jolda kóligi buzylyp, sol sebepten, Dossor kentine jaıaý jetken. Densaýlyǵy qalypty, medıtsınalyq kómekti qajet etpedi», -dep málim etti departamenttiń baspasóz qyzmeti.
