Atyraý oblysynda isti burmalaǵan polıtseı sottaldy
ATYRAÝ. QazAqparat - Atyraý oblysynda isti burmalaǵan polıtseı sottaldy, dep habarlaıdy QazAqparat tilshisi.
«Atyraý oblysy Qurmanǵazy aýdandyq sotynda «Ákimshilik is boıynsha protsessýaldyq qujattardy burmalaý» baby boıynsha qylmys jasaǵan polıtsııa qyzmetkerine qatysty qylmystyq is qaraldy. Sottalýshy ýákiletti organ qyzmetkeri bola tura, ákimishilik is boıynsha dálelderdi burmalaǵan. Ol qoǵamdyq orynda temeki tartqany úshin ákimshilik quqyq buzýshylyq týraly hattama toltyrǵan. Hattamada zardap shegýshiniń qoly men qoltańbasyn syrttaı uqsatyp qoıǵan», - dep habarlady Atyraý oblysy Qurmanǵazy aýdandyq sotynyń baspasóz qyzmetinen.
Zardap shegýshi sotta tasjolda kele jatqan kezde ony polıtseıdiń toqtatyp, shyraǵyn jaqpaǵanyn eskertkenin aıtty. Polıtseı ákimshilik quqyq buzýshylyq týraly hattama toltyrmaı, onyń ornyna júrgizýshige bos qaǵaz berip, qol qoıýyn suraǵan. Keıin zardap shegýshi oǵan qoǵamdyq orynda temeki tartqany úshin aıyppul salynǵanyn bilgen, alaıda ol eshqashan temeki shekpegen.
