Atyraý oblysynda iri qara maldyń qyrylýy toqtady

ASTANA. QazAqparat - Atyraý oblysynda jekdýadaqtan maldyń qyrylýy toqtady. Bul týraly búgin jýrnalısterge arnalǵan brıfıng barysynda QR Aýyl sharýashylyǵy mınıstrligi veterınarlyq baqylaý men qadaǵalaý komıteti bıologııalyq qaýipsizdik basqarmasynyń jetekshisi Saltanat Ábilqasymova málim etti, dep habarlaıdy QazAqparat.

«Qazir Atyraý oblysynda jekdýadaq aýrýyna baılanysty ýshyqqan jaǵdaı turaqtandy deýge bolady. Ózderińiz bilesizder, shilde aıynda óńir boıynsha osy aýrý tarap ketken bolatyn. Buryn Qazaqstanda bul aýrý tirkelmegen. Іri qara maldardyń analızderi Reseı Federatsııasynyń Vladımır qalasynda ornalasqan Búkilreseılik ǵylymı-zertteý ınstıtýtyna jiberilgen edi. Saraptamanyń qorytyndysyna súıensek, maldar nodýlıarlyq dermatıt aýrýyna shaldyqqan»,-dedi S.Ábilqasymova.

Aýyl sharýashylyǵy mınıstrliginiń baspasóz qyzmeti bergen aqparatqa súıensek, bul aýrý Qazaqstanda buryn múlde kezdespegen. Al, Atyraý oblysyna Reseıden kelgen eken.

S.Ábilqasymovanyń aıtýynsha, zertteý nátıjesi belgili bolǵan soń, oblys ákimi Mahambet Qurmanǵazy jáne Isataı aýdandarynda karantın jarııalaǵan.

«Qazir osy aýdandarda ınfektsııaǵa qarsy sharalar júrip jatyr. Maldyń qyrylýy toqtady. Oblystaǵy qalǵan maldardy egip, emdeý úshin jergilikti bıýdjetten 4,5 mln teńge bólindi»,-dedi S.Ábilqasymova.

Buryn habarlaǵanymyzdaı, Atyraý oblysynda nodýlıarly dermatıt juqtyrǵan 700 sıyr qyrylǵan. 27 shildeden bastap óńirde karantın jarııalanǵang edi. Qazir mal dárigerleri osy aýrýdyń belgileri baıqalǵan maldardy emdep jatyr.