Atyraý oblysynda iri energojobalar iske asyrylady

ATYRAÝ. QazAqparat – Atyraý oblysynda energııa jelisin jaqsartatyn iri jobalar iske asyrylady, dep habarlaıdy QazAqparat.

Oblys ákimi Mahambet Dosmuhambetov aldaǵy jylý berý maýsymyna daıyndyq máselesi talqylanǵan keńes ótkizip, salalyq basqarma basshysyna elektr energııasy jelisin jaqsartýdy tapsyrdy.

Oblystyq Energetıka jáne turǵyn-úı kommýnaldyq sharýashylyq basqarmasynyń basshysy Erlan Nazarovtyń aıtýynsha, Atyraýda energııa júıesin jaqsartý úshin birqatar joba iske asyrylady.

«Sonyń ishinde batys aımaqtaǵy elektr jelisiniń qýatyn arttyrý da bar. Bul joba 2023 jyly aıaqtalady. Buǵan qosa, Atyraý, Qulsary, Teńiz, Beıneý qosalqy stantsııalarynda 110 kV jáne 220 kV ashyq taratý qondyrǵylary qaıta jańartylady. Sondaı-aq, Jaıyq ózeniniń oń jaǵalaýyndaǵy elektr qondyrǵylaryn qaıta jańǵyrtý josparlanǵan», - dedi Erlan Nazarov.

Onyń málim etýinshe, oblysta 1759 kóppáterli turǵyn úı bar. Bularda kommýnaldyq másele týyndamaýy úshin 15,6 shaqyrym jylý, 696,7 shaqyrym elektr, 1,4 shaqyrym sý jáne káriz jelilerine jóndeý jumystary bastalǵan.

«Bizdiń basty mindetimiz – turǵyndardyń qalypty tirshiligi úshin mańyzdy nysandardyń úzdiksiz jumys isteýin qamtamasyz etý. Ótken jylý berý maýsymynda kemshin tustar baıqaldy. Qańtar aıynda elektr jelisindegi birkúndik aqaý kezinde iri kásiporyndar, áleýmettik nysandar, oblys turǵyndary qıyndyqqa tap boldy. Adaǵy ýaqytta mundaı apattyq jaǵdaıdy boldyrmaý úshin birlesken jumystardy qolǵa alýymyz qajet», - dedi oblys ákimi Mahambet Dosmuhambetov.