Atyraý oblysynda ıpotekalyq baspana qoljetimdi bolady
«Buryn ekinshi deńgeıli bankter ıpotekany jyldyq 17%-ben bergen bolsa, qazir ıpoteka berýdi múldem toqtatyp tastady. Al osy baǵdarlama arqyly memleket ıpotekalyq qaryz boıynsha syıaqy mólsherlemesiniń 6-7% sýbsıdııalaıtyn bolady», - dep habarlady Atyraý oblysy qurylys basqarmasynyń basshysy Málik Amanov. Nátıjesinde qaryz alýshynyń aı saıynǵy tólemi 30-40 paıyzǵa azaıady.
«Nurly jer» baǵdarlamasy ekinshi deńgeıli bankter beretin syıaqy mólsherlemesin sýbsıdııalaý arqyly ıpotekalyq nesıeniń qoljetimdiligin arttyrýǵa baǵyttalǵan.
Aıta ketken jón, baǵdarlamaǵa qatysý úshin ıpoteka alýǵa kezekte turý shart emes, jeke basyńyzdaǵy turǵyn úılerdiń sany da mańyzdy emes. «Nurly jer» baǵdarlamasy boıynsha ıpotekalyq qaryz alýǵa Qazaqstan Respýblıkasynyń kez kelgen azamaty ótinim bere alady.
«Nurly jer» baǵdarlamasynyń ıpotekalyq nesıeleýdiń qoljetimdiligin arttyrý, jeke kompanııalardyń turǵyn úı salýyn yntalandyrýmen qatar basqa da maqsattary bar.
«Búginde Atyraý oblysynda «Nurly jer» baǵdarlamasymen halyqtyń áleýmettik álsiz toby úshin nesıelik jáne jalǵa beriletin turǵyn úı qoryn qurý aıasynda jalpy aýdany 135,6 myń sharshy metr bolatyn, 2007 páterli 37 turǵyn úıdiń qurylysy júrip jatyr. Qurylys jumystary jyl sońyna deıin aıaqtalady. Bıylǵy 6 aıda 291,8 myń sharshy metr turǵyn úı paıdalanýǵa berildi, ıaǵnı 12 úı, 717 páter», - deıdi Atyraý oblystyq qurylys basqarmasynyń basshysy Málik Amanov. - Sonymen qatar, bıyl ınjenerlik-kommýnıkatsııalyq ınfraqurylym qurylysyna 11,2 mlrd teńge bólindi, ol turǵyn úı qurylysynyń qarqynyn jedeldetýge múmkindik beredi. Qazir 4 368 páterden turatyn 43 kóp páterli turǵyn úıdiń jobalyq-smetalyq qujattamasy daıyndalý ústinde. Qurylys 2018 jyly Atyraý qalasynyń «Bereke», «Nursaıa» yqshamaýdandarynda josparlanǵan. Bıyl atalǵan jobalardyń ishinde jergilikti bıýdjet esebinen 2118 páterli 14 turǵyn úıdiń qurylysy bastalady.
Qurylys basqarmasynyń basshysy Málik Amanovtyń aıtýynsha, úı salýshylar «Nurly jer» baǵdarlamasyna belsendi qyzyǵýshylyq tanytýda, qazir bankter birneshe jobalardy qarap jatyr. Boljam boıynsha azamattardan ótinish qabyldaý 2017 jyldyń tamyz aıynda bastalady.
Kúni búgin baǵdarlamaǵa qatysýǵa 7 bank qoldaý kórsetip otyr, olar: «Tsesnabank» AQ, «Sberbank» AQ, «TsentrKredıtBank» AQ, «Bank RBK» AQ, «ATFBank» AQ, «Qazaqstannyń turǵyn úı jınaq banki» AQ, «Tengri Bank» AQ.
«TsentrKredıtBank» pen «ATFBank» ótinimderdi qabyldaýdy bastady.
