Atyraý oblysynda ınvestorlardy tartý boıynsha jumys jolǵa qoıylǵan
ASTANA. QazAqparat - Atyraý oblysynda memlekettik-jeke menshik áriptestik aıasynda tıimdi, ári erekshe joba júzege asqaly tur. «Batys tranzıt» AQ MJÁ aıasynda Atyraý qalasynyń kóshe jaryǵyn qamtamasyz etýdi qolǵa aldy.
Negizi, «Batys tranzıt» AQ memlekettik-jeke menshik áriptestik aıasynda memlekettik deńgeıdegi keıbir jobalardy sátti júzege asyra bilgen kompanııa. Máselen, 2005 jyly osy kásiporyn Soltústik Qazaqstan men Aqtóbe oblysyn elektr torabymen baılanystyratyn aımaqaralyq jeliniń qurylysyn júrgizdi.
Memlekettik-jeke menshik áriptestik aıasynda bul kompanııa endi áleýmettik mańyzy bar basqa da jobalarǵa atsalysa bastady. Atyraý oblystyq energetıka jáne turǵyn úı kommýnaldyq sharýashylyq basqarmasynyń basshysy Jumabaı Qaraǵaevtyń aıtýynsha, «Memlekettik-jeke menshik áriptestik aıasynda 39 kósheni jaryqpen qamtamasyz etý úshin jańadan baǵandar turǵyzylyp, jaryq únemdeıtin lampalar qoıylady. Qurylysty 100% ınvestor ózi qarjylandyryp, qurylys jumystary bitkesin 6 jyl boıy osy kóshelerdi jaryqpen qamtýdy mindetine alady».
Bul jobalardy iske asyrý ýaqyt talabynan týyp otyr. Atyraý qalasynyń kótegen kósheleri jaryqtandyrylmaǵan. Sondyqtan aımaq basshylyǵy úshin túnde túnekke oranatyn kóshelerdi jaryqtandyrý áleýmettik turǵydan da mańyzdy iske aınaldy.
Memlekettik-jeke menshik áriptestik aıasynda júzege asyratyn jobalar mynadaı baǵytta qamtylady:
- Memlekettik jáne jeke áriptesterdiń arasynda iske asatyn jobalar boıynsha táýekeldi teńdeı bólisý;
- Jobaǵa jeke ınvestordyń qarjysy salynatyn bolǵandyqtan, bıýdjettiń shyǵysyn azaıtý;
- Memlekettik satyp alýlardan memlekettik-jeke menshik áriptestiktiń basty aıyrmasy qurylys sapaly salynady. Sebebi, ol isti júzege asyryp, halyqqa qyzmet kórsetý mindetin de jeke ınvestor óz jaýapkershiligine alady.
Tabysy sapaly qyzmetpen esepteletin bolǵasyn kásipker de eń aldymen sapaǵa qyzmet jasaıdy.
«Qazaqstandyq memlekettik-jeke menshik áriptestigi ortalyǵy» aktsıonerlik qoǵamynyń sarapshysy Shynasyl Ernazar bul kelisim týrasynda óz oıymen bólisti: «Joba qujattaryn daıyndaýdy alǵashqy kelisimde ınvestor ózine alǵan bolatyn. Alaıda, ony sheshý uzaqqa sozylyp ketkesin «Qazaqstandyq memlekettik-jeke menshik áriptestigi ortalyǵy» AQ eki arada keńesshi retinde qyzmet atqardy».
Osylaısha, Atyraý oblysy ákimdigi men Qazaqstandyq memlekettik-jeke menshik áriptestigi ortalyǵynyń qoldaýymen bıznes úshin de, memleket úshin de tıimdi jobalar iske asa bastady.
Qazaqstandyq memlekettik-jekemenshik áriptestigi ortalyǵynyń negizgi mindeti - ınvestorlarmen seriktestik ornatý. Ortalyq josparlaǵan jobalar týraly aqparattar ortalyqtyń saıttarynda jarııalanady. Sheteldik ınvestorlar negizgi málimetterdi sol jerden alady. Sonymen qatar, jobalarǵa qatysty ártúrli dóńgelek ústelder uıymdastyrylady. Jáne de memlekettik-jekemenshik áriptestiktiń Zańnamasy aıasynda «básekelestik pikirtalas» degen jańa mehanızm iske qosylǵan. Ol jergilikti jáne sheteldik ınvestorlarmen birlese otyryp jańa jobalardy talqylaýǵa múmkindik beredi. Taıaýda memlekettik-jekemenshik áriptestigi jobasy boıynsha shoǵyrlandyrylǵan aqparatqa qoljetimdilikti qamtamasyz etý jolymen ınvestorlar ortasyn keńirek tartý úshin ortalyqta «Biryńǵaı aqparattyq qory» iske qosý kútilýde.
Bul áleýetti ınvestorlar úshin aqparattyń qoljetimdiligin qamtamasyz etedi. Qazirgi tańda 1,5 trln teńge somasyndaǵy memlekettik-jekemenshik áriptestiginiń 354 jobasy júzege asyrý men josparlaýdyń túrli satysynda tur. Onyń ishinde 335 jobasy aımaqtyq joba bolyp tabylady. Sońǵy bir jarym jylda 43 jobasy boıynsha 31,1 mlrd teńge jalpy somasynda kelisim-shart jasaldy. Sheteldik ınvestorlardyń da qyzyǵýshylyǵy joǵary. Bundaı seriktestik bir jaǵynan bıýdjetke de jeńildik ákeledi.
