Atyraý oblysynda ıesiz uńǵymada paıda bolǵan «Munaı kóli» jerasty sýyna tolǵan
ATYRAÝ. QazAqparat - Atyraý oblysynda ıesiz qalǵan uńǵymadan paıda bolǵan «Munaı kóli» jerasty sýyna tolǵan, dep habarlaıdy QazAqparat tilshisi.
Aıta keteıik, Atyraýdan 70 shaqyrym qashyqtyqta munaıǵa toly shaǵyn kól paıda boldy. Munaıǵa toly kól týraly aqparat aldymen áleýmettik jelide taraǵan edi. Onda qoldanýshylardyń biri vıdeo júktegen. Taspada Mahambet aýdany Tańdaı aýylyna jaqyn jerdegi sýat túsirilgen. Sýattyń betinde munaıdyń qalqyp júrgenin baıqaýǵa bolady. Bul aýyl Atyraýdan 70 shaqyrym qashyqtyqta ornalasqan.
Atyraý oblysy Tabıǵı resýrstar jáne tabıǵat paıdalanýdy retteý basqarmasy habarlaǵandaı, Tańdaı aýylyndaǵy «Lıman» ýchaskesiniń aýmaǵyndaǵy ıesiz qalǵan uńǵyma jerasty sýyna tolǵan.
1964 jyldan beri ıesiz qalǵan uńǵyma ornalasqan «Lıman» ýchaskesi «Embimunaı» AQ balansynda bolǵan, keıin memlekettiń ıeligine ótken.
«2010 jyly «Embimunaıgaz» AQ-y atalǵan uńǵymany joıý jumystaryn júrgizgen. Alaıda uńǵyma saǵasynyń bolmaýyna baılanysty, ony joıý múmkin bolmaǵan. Keıbir málimetterge sáıkes Keńes Odaǵy kezinde burǵylaý barysynda burǵylaý qondyrǵysy jer astyna batyp, nátıjesinde shuńqyr paıda bolyp, jerasty sýy kóterilgen, betine munaı plenkasy paıda bolǵan», - dep habarlady Atyraý oblysy Tabıǵı resýrstar jáne tabıǵat paıdalanýdy retteý basqarmasynyń baspasóz qyzmeti.
2018 jyly Energetıka birinshi vıtse-mınıstri M.Dosmuhambetovtyń tóraǵalyǵymen ótken avarııalyq munaı-gaz jáne gıdrogeologııalyq uńǵymalardy joıý máseleleri jónindegi keńes hattamasynda QR Investıtsııalar jáne damý mınıstrligimen 2018 jylǵy respýblıkalyq bıýdjetti naqtylaý barysynda «Lıman» ýchaskesindegi K-30J jáne ET-4 uńǵymalaryn joıý úshin jobalaý-smetalyq qujattamalar ázirleý boıynsha jumystar engizilgeni atap kórsetilgen.
Baspasóz qyzmetiniń habarlaýynsha, ekologııa departamenti men «Embimunaıgaz» AQ mamandary barlyq ıesiz qalǵan, sonyń ishinde «Lıman» ýchaskesinde ornalasqan uńǵymalardyń jaı-kúıine turaqty negizde monıtorıng júrgizýde. Mamandardyń baǵalaýy boıynsha jerasty sýy tolǵan shuńqyr qorshaǵan ortaǵa qaýip týdyrmaıdy.
