Atyraý oblysynda halyq sanaǵynan ótkender sany 550 myńnan asty
Atyraý oblysy ákiminiń orynbasary Narıman Taýshovtyń aıtýynsha, sanaq júrgizýshiler brıgadasynda 703-ke jýyq qyzmetker tartylǵan.
Onyń ishinde 594 ıntervıýer bar.
«Ulttyq halyq sanaǵyn júrgizýshiler kún saıyn qıyndyqqa tap bolady. Jeke sektordaǵy turǵyn úılerdiń ıeleri esik ashpaıdy. Keıbiri baılaýly ıtin bosatyp jiberedi. Ulttyq halyq sanaǵynyń memlekettik basqarýda sheshýshi ról atqaratynyn túsinýimiz qajet. Elimizde qansha adam turady? Máselen, aldaǵy 10 jylda qansha balabaqsha men mektep salý kerek? Qansha adam jumyssyz júr? Osyndaı saýaldardy zerdeleý arqyly eldiń damý strategııasy jasalady», - deıdi Narıman Taýshov.
Onyń málimetine súıensek, Atyraý oblysynda búginge deıin 553 954 adam ulttyq halyq sanaǵynan ótkeni belgili boldy. Bul oblys turǵyndarynyń jalpy sanynyń 83,4 paıyzyn qurap otyr.
Eske sala ketelik, buǵan deıin Atyraý oblysynda ulttyq halyq sanaǵynan 539 321 adam ótkenin habarlaǵan edik.
