Atyraý oblysynda gúldegen lotosty kórýge keletin týrıster sany kóbeıdi
Óńirlik kommýnıkatsııalar qyzmetiniń málimetine súıensek, Qurmanǵazy aýdanyndaǵy Qıǵash ózeninde lotostyń gúldený maýsymy bastaldy.
Lotos shildeniń shildeniń ortasynan tamyzdyń sońǵy aptasyna deıin jalǵasady.
Lotos 5 myń gektardy qamtıtyn almaqta gúldeıdi. Ony kórý úshin kúnine 50-ge jýyq týrıst keledi.
Ekaterına Habıbýllına – Reseı Federatsııasynyń Máskeý qalasynan arnaıy kelgen týrısterdiń biri. Sheteldik týrıst lotos alqabyn bıyl alǵash ret kórgen.
«Tabıǵat osyndaı sulýlyǵymen qymbat ǵoı. Lotos alqaby tamasha eken. Óte keremet áser aldym. Bul jerden tek lotosty ǵana emes, aqqý, aqqutan syndy qustardy da tamashalaı aldyq», -deıdi Ekaterına Habıbýllına.
Atyraý oblysyndaǵy Qurmanǵazy aýdany – lotos ósetin jalǵyz aımaq. Lotos alqabyn kórýge kelýshilerge arnaıy nusqaýlyq kómek kórsetetin kásipkerlik nysandar bar.
«Qazir birneshe týrıstik kompanııamen kelissóz júrgizýdemiz. Kelisishartqa sáıkes aýdanǵa kelgen týrısterdi qaıyqpen lotos alqabyna aparyp-ákelemiz. Týrıster ornalasatyn arnaıy bazada bar. Onda jatar orny men tamaǵy ýaqytyly beriledi. Bizdiń basty maqsatymyz – týrısterdiń qaýipsizdigin, sýda júrýdiń tehnıkalyq talabyn qatań saqtaý», -deıdi «West Motors service» JShS-niń ókili Jánibek Aktananov.
Qurmanǵazy aýdandyq kásipkerlik jáne týrızm bóliminiń basshysy Nurlybek Tólepovtyń aıtýynsha, týrıster qatary jyl saıyn artyp otyr. Sol sebepten, Qıǵash ózeniniń boıyndaǵy lotos gúliniń alqabyna qorǵaý men kútip-baptaý jumystaryn júrgizý qajet.
«Lotos alqaby tabıǵat jaǵynan qorǵalatyn aımaq bolǵandyqtan, «Qyzyl kitapqa» engen. Alaıda, kelgen týrıster tabıǵatty baǵalamaıdy. Olardyń arasynda gúldi syndyryp, julý faktileri kezdesip otyr. Soǵan sáıkes, arnaıy quzyrly organdar taraptarynan baqylaý bolǵanyn qalaımyz», -deıdi Nurlybek Tólepov.
Onyń deregine súıensek, Qıǵash ózeniniń boıynda 4 jeke kásipkerlik nysan bar. Bıylǵy jyldyń sońyna deıin eki týrıstik bazanyń qurylysy aıaqtalady.
Іshki týrızmdi damytý maqsatynda 7 kásipkerge jer telimi berilgen. Kásipkerler týrıstik nysandardy úsh jyl ishinde iske qosýy tıis.
Eske sala ketelik, budan buryn Qıǵash ózeniniń saǵasynda bıiktigi 1,5 metrlik lotos gúldegenin habarlaǵan bolatynbyz.
