Atyraý oblysynda gaz 50 paıyzǵa deıin qymbattaýy múmkin

ATYRAÝ. QazAqparat - Atyraý oblysynda gazdyń baǵasy 50 paıyzǵa deıin qymbattaýy múmkin. Bul týraly monopolıst kompanııa qoǵamdyq tyńdaýlar barysynda málim etti, dep habarlaıdy QazAqparat tilshisi.

2016 jyldyń qyrkúıeginen beri oblysta turǵyndarǵa arnalǵan gazdyń tarıfi bir tekshe metri úshin - 6,4 teńgeni, turǵyndarǵa jylý energııasyn óndiretin jylýenergetıkalyq kompanııalar úshin  - 7,64 teńgeni, zańdy tulǵalar úshin 17,68 teńgeni (qosylǵan qun salyǵynsyz) qurap keldi.

Qoǵamdyq tyńdaýlarǵa qatysýshylarǵa málim etilgendeı, «QazTransGazAımaq» 1 tamyzdan bastap Atyraý oblysynyń tutynýshylaryna taýarly gazdy bosatý baǵasyn qaıta qaraý týraly ótinim bildirgen.

«Halyq pen jylýenergetıkalyq kompanııalar úshin gazdyń baǵasyn 9,61 teńgege deıin; bıýdjettik mekemeler úshin 40,93 teńgege deıin; zańdy tulǵalar úshin 27,41 teńgege deıin arttyrýdy surap otyrmyz», - dep ótinimmen tanystyrdy  «QazTransGazAımaq» Atyraý fılıalynyń dırektory Maqsut Ábýov.

Tarıfti qaıta qaraýǵa negiz bolǵan sebepterdiń biri Qazaqstannyń ishki naryǵynda taýarly gazdyń kóterme baǵasynyń 11 paıyzǵa artýy. Sondaı-aq shıkizatqa, materıaldar men energııaǵa baǵanyń ósýimen baılanysty gazdy jetkizý shyǵyndarynyń artýy negiz bolyp otyr. Budan bólek, ınvestıtsııalyq baǵdarlamanyń engizilýi men abonentter sanynyń artýy da gaz baǵasyn arttyrýǵa májbúr etýde.

Qoǵamdyq tyńdaýlardyń hattamasy túpkilikti sheshim qabyldaý úshin Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıtetine (monopolııaǵa qarsy vedomstvo) joldandy.