Atyraý oblysynda «Ǵasyr áje» atanǵan keıýana bar
ATYRAÝ. QazAqparat - Atyraý oblysynda ǵasyr jasaǵan keıýanaǵa qurmet kórsetildi, dep habarlaıdy QazAqparat tilshisi.
Qurmanǵazy aýdanyndaǵy Aqkól aýyldyq okrýginde Uly Otan soǵysy jyldary temir jol tabanyn tóseýge, qıraǵan Stalıngradty qalpyna keltirýge qatysqan tyl ardageri, «Altyn alqa» ıegeri Nursulý Sultanovanyń 100 jasqa tolýyna oraı saltanatty shara uıymdastyryldy.
Nursulý Isahatqyzy 1918 jyly 29 tamyzda Nurjaý aýyldyq okrýginiń Kishtaı túbek aýylynda ómirge kelgen. Aýyldan 7-8 shaqyrym qashyqtyqtaǵy tórt jyldyq bastaýysh mektepte oqyp, saýatyn ashqan. Soǵystan keıin balyqshy Qabdyjálel Sultanovpen otbasyn quryp, aýdanda túrli qyzmetter atqardy. Ómirge 8 bala ákelip, 27-den asa nemere men jıen, 50 shaqty shóbere, olardan basqa shópshegi men nemenesin súıip otyr. Barlyǵyn qosqanda 107-den asa urpaq bar. Balalarynyń aldy 70-ke aıaq bassa, kenjesi 60-tyń alqymyna shyqqan. Uly Otan soǵysynyń 60, 65, 70 jyldyq mereıtoılyq medaldarymen marapattalǵan.
«Nursulý anamyz qıyn kezderde eńbek etip, ómirlik jarymen el damýyna úles qosyp, segiz birdeı ul-qyzyna jaqsy tárbıe berip, er jetkizdi. Ótken jyly Asan aýyldyq okrýginde soǵys jesiri Ýaǵısa Muhtarova anamyz 100 jasqa tolsa, búgingi kúni Nursulý ájemiz ózderińizdiń ortalaryńyzda aman-esen Allanyń bergen jasyna jetip otyr. Ájemizge qudaı qýat berip, alǵa qaraı da balalarynyń, nemere-shóbereleriniń qyzyǵyn kórip, ortamyzda osylaı júre bersin degim keledi. Osyndaı júzge tolǵan analarymyz ben atalarymyzdyń qatary kóbeıe tússin», - dedi aýdan ákimi Bıboz Shaıahmetov.
Sondaı-aq, aýdan ákimi Nursulý Isahatqyzyn «Ǵasyr áje» atanýymen quttyqtap, Qurmanǵazy aýdanynyń Qurmet gramotasyn, Quttyqtaý hatyn, syı-sııapatyn tabys etti. Keıýana aýdan basshysyna rızashylyǵyn bildirip, aq batasyn berdi.
«1942 jyly jaý Stalıngradqa taıanǵanda Gýrev-Astrahan temir jolyn salýǵa uıǵarym shyqty. Sol jyldyń qarasha aıynda bastalǵan jumys 1943 jyldyń maýsymyna deıin jalǵasty. Oǵan bizdiń aýdannan eki júz elýdeı adam qatysqan. Sol eńbekkerlerden qazir aýdanda on jetisi ǵana qaldy. Aldy 100, sońy 94 jasta. Solardyń biri - osy anamyz. Sondyqtan urpaqtarynyń tiregi, súıenishi Nursulý Isahatqyzyna áli de aman-esen otyra berińiz degen tilegimdi aıtamyn», - dedi aýdandyq ardagerler keńesiniń tóraǵasy Orynǵalı Qumarǵalıev.
