Atyraý oblysynda garajdaǵy eki kólik órtenip, sheteldik azamat kúıip qaldy
ATYRAÝ QazAqparat – Atyraý oblysynda garajdaǵy eki kólik órtenip, sheteldik azamatty kúıik shaldy, dep habarlaıdy QazAqparat.
Oblystyq tótenshe jaǵdaılar departamenti baspasóz qyzmetiniń málimetine qaraǵanda, órt keshe, 4 qazanda Qurmanǵazy aýdanynda bolǵan.
Qurmanǵazy aýdanyndaǵy №7 órt sóndirý bólimine saǵat 13:46-da Qurmanǵazy aýylynyń Jeruıyq kóshesinde ornalasqan turǵyn úıdiń janyp jatqany týraly habar tústi. Órt sóndirýshiler oqıǵa ornyna saǵat 13:50-de jetti.
Sol kezde jalpy aýdany 150 sharshy metr bolatyn ýaqytsha turǵyn úı men oǵan japsarlas salynǵan garajdyń tóbe jabyndysy janyp jatqany anyqtaldy.
Jalyn saldarynan garajdyń ishinde turǵan «Toyota Ipsum» jáne «VAZ-2114» markaly eki avtokólik tolyqtaı janyp ketti.
Órt sóndirýshilerdiń jedel áreket etýiniń nátıjesinde ýaqytsha turǵyn úıdiń ári qaraı órtenýine jol berilmedi.
«Órt saǵat 14:33-te oqshaýlanyp, saǵat 14:36-da tolyqtaı joıyldy. Órt kezinde Ózbekstan Respýblıkasynyń azamaty, Horezm qalasynyń 1989 jylǵy turǵyny II-dárejeli, 8-20% termııalyq kúıik jaraqatyn alyp, aýdandyq ortalyq aýrýhananyń hırýrgııa bólimine em alýǵa jatqyzyldy»,-dep habarlady departamenttiń baspasóz qyzmeti.
Jalyndy sóndirýge Qurmanǵazy aýdandyq №7 órt sóndirý bóliminen 12 qyzmetker men 2 tehnıka jumyldyryldy. Qazir órttiń shyǵý sebebi anyqtalýda.
Eske sala ketelik, budan buryn Atyraý oblysynda bir qabatty ǵımarattaǵy sýpermarket pen ashana órtenip ketkenin habarlaǵan edik.
