Atyraý oblysynda erli-zaıyptylar saýmaldy tabys kózine aınaldyryp otyr
Mahambet aýdanynyń Sarytoǵaı aýylynda turatyn Talap Qajımov pen Zámzágúl Jańabaeva 5 jyl buryn jylqy sharýashylyǵyn qolǵa alǵan. Qazir saýmal satýdy otbasylyq kásipke aınaldyryp ottyr.
«Men 1998-2008 jyldary Jylyoı aýdanyndaǵy Teńiz ken ornynda montajdaýshy bolyp jumys istedim. Keıin vahtalyq jumysty qoıyp, jylqy sharýashylyǵyn qolǵa aldym.
Bastapqyda bir úıir jylqym bar edi. Qazir eki úıirge jetkizdim. Úsh bıeni saýamyz. Jylqyǵa qandaı azyq berýdi bilmeı, at baptaý, sanyn kóbeıtý múmkin emes. Bir qaraǵanda shóp berýmen is bitkendeı kórinýi múmkin. Toıa jesin dep aldyna úıip-tókpeı, qajetti azyqty ólshep, eseptep berý kerek. Jylqy úshin eń tabıǵı azyq – dala shóbi. Jańa orylǵan shóp bolsa tipti nárlene túsedi. Janýar baptaýyńa qaraı sút beredi», -deıdi Talap Qajımov.
Erdi-zaıyptylar saýmal men baptaǵan qymyz satýdy 2017 jyly bastaǵan. Sarytoǵaı aýylyndaǵy Q.Qalybekov atyndaǵy orta mektepte bıologııa páninen sabaq beretin Zámzágúl Jańabaevanyń aıtýynsha, alǵashynda saýmal satý týraly oı bolmaǵan.
«Enemniń ishki qurylysy aýyryp, sol kisiniń densaýlyǵy úshin bıe saýýdy bastadym. Saýmaldy kúndelikti úzbeı ishkennen keıin enemniń densaýlyǵy jaqsardy. Sodan beri bıeni úzbeı saýyp kelemin. Júzge jýyq turaqty tutynýshymyz bar. Bıe saýýdy mamyr aıynan qazanǵa deıin jalǵastyramyn. Bir bıe kúnine 6-7 ret saýylady. Bir saýǵanda 1 lıtr sút beredi. Saýmaldy ár adam dıagnozy men tábetine qaraı ártúrli mólsherde ishedi. Qazir suranystyń kóbi Atyraý qalasynan bolyp tur», -deıdi Zámzágúl Jańabaeva.
Endi erli-zaıypty memleket tarapynan beriletin qoldaýdy paıdalanyp, otbasylyq kásipti keńeıtýdi kózdep otyr.
Eske sala ketelik, buǵan deıin Atyraý oblysynda ulttyq qolónerdi qaıta jańǵyrtqan otbasy turatynyn jazǵan edik.
