Atyraý oblysynda eńbek táýekelderiniń kartasyna 14 kásiporyn engizilgen
ATYRAÝ. QazAqparat - QR Kásipodaqtar federatsııasy tóraǵasy Satybaldy Dáýletalın eki kúndiń jumys saparymen Atyraý oblysyna keldi, dep habarlaıdy QazAqparat.
Sapar maqsaty oblystaǵy eńbek daýlarynyń týyndaý yqtımaldyǵy bar kásiporyndardy aralaý, áleýmettik shıelenis pen eńbek daýlarynyń aldyn alý. Jalpy Atyraý oblysynda eńbek táýekelderiniń kartasyna 14 kásiporyn engizilgen.
QRKF tóraǵasynyń óńirge jumys sapary «Qazpochta» AQ Atyraý oblystyq fılıaly basshylyǵymen kezdesýden bastaldy. Odan keıin «Qaztehmunaıservıs» jáne «Munaı kólik» JShS-ine bardy. Atalǵan mekemelerdegi áleýmettik-eńbek qatynastarynyń ózekti máseleleri atap aıtqanda, jalaqyny kóbeıtý, vahtalyq aýysym kezeńi jáne tutastaı alǵanda laıyqty eńbek jaǵdaılaryn jasaý máseleleri áleýmettik áriptestermen bolǵan kelissózderdiń negizgi taqyrybyna aınaldy.
Osy kezdesýlerden keıin jergilikti BAQ ókilderine bergen suqbatynda Kásipodaqtar federatsııasynyń tóraǵasy «Bular eńbek daýy týyndaýy múmkin eńbek ujymdary. Búgin birinshi kezeńinen óttik. Bul kelissózder erteń de jalǵasyn tabady. Óıtkeni sheshý ońaı emes. Basty maqsat- áleýmettik áriptestik aıasyndaǵy syndarly dıalog arqyly áleýmettik shıelenisti boldyrmaý, ony zań sheńberinde sheshý» degendi aıtty.
Satybaldy Dáýletalın Kásipodaqtar federatsııasynyń jyl basynan beri aımaqtardaǵy áleýmettik shıelenisterge kúndelikti monıtorıng júrgizip otyrǵanyn jetkizdi. Monıtorıng málimetteri boıynsha, jyl basynan beri elde 37 eńbek daýy tirkeldi. Olardyń kópshiligi kásipodaqtar joq kásiporyndarda boldy.
«Alaıda bizdiń múshelik uıymdar, oblystardaǵy kásipodaq ortalyqtary olardyń barlyǵynnyń ońtaıly sheshilýine óz úlesin qosýda. Eńbek daýlarynyń negizgi sebepteriniń biri – jalaqynyń tómendigi jáne eńbek jaǵdaılarynyń nasharlaýy. Bul máseleler bizdiń 2020-2025 jyldarǵa arnalǵan strategııamyzdaǵy mindetterdiń qatarynda»,-dedi QRKF tóraǵasy.
Satybaldy Dáýletalın federatsııa qazir eń tómengi jalaqy mólsherin birtindep kóbeıtý, menshiktiń barlyq formasyndaǵy kásiporyndardaǵy jumyskerlerdiń jalaqysyn ındeksteýdi zańnamalyq turǵydan bekitý, «Damýshy elderdi erekshe eskere otyryp, eń tómengi jalaqyny belgileý týraly» Halyqaralyq eńbek uıymynyń №131 Konventsııasyn ratıfıkatsııalaý boıynsha jumys jasap jatqanyn jetkizdi. Sonymen qatar, eldegi 42 500 teńge mólsherindegi eń tómengi jalaqynyń úsh jyldan beri ózgerissiz ekenin eske salyp, Halyqaralyq Eńbek Uıymy standartyna sáıkes eń tómengi jalaqy ortasha jalaqynyń 50% -yn quraýy kerektigin eskertti.
«Búgingi kúni, eger Qazaqstanda ortasha jalaqy 206 000 teńge bolsa, eń tómengi jalaqy 103 000 teńgeni quraýy qajet. Bizdiń elde eń tómengi jalaqy ortasha jalaqynyń 20%-y. Qazirgi ekonomıkalyq jaǵdaıdy eskere otyryp, ony birden sheshý múmkin emes ekenin túsinemiz. Ony kezeń-kezeńmen sheshýge jol bar ǵoı dep oılaımyn.»,-dedi QRKF tóraǵasy.
Kásipodaqtar federatsııasynyń tóraǵasy budan soń óńirdegi kásipodaq múshelerine arnalǵan «Eńbek daýlaryn sheshý jáne eńbek zańnamasyn qoldaný» atty semınardyń ashylýyna qatysty.
Semınar qatysýshylaryna arnalǵan alǵysózinde Satybaldy Dáýletalın kásipodaqtar federatsııasynyń jumyskerlerdiń eńbek jáne áleýmettik-ekonomıkalyq quqyqtary men múddelerin qorǵaý júıesin jetildirý boıynsha atqarylyp jatqan jumystar týraly baıandady. Eńbekke aqy tóleý júıesin jetildirý sharalary týraly aıta kele, elde 145 myń ujymdyq shart bolsa, ındeksteý tek olardyń 10 %-da ǵana baryn atap ótti.
«Ujymdyq sharttyń mazmuny boıynsha jumys barysynda kásipodaqtar men jumys berýshiler arasyndaǵy ózara is-qımyl árdaıym tıimdi bola bermeıdi. Tájirıbede deklaratsııalyq sıpattaǵy ujymdyq sharttar da bar. Ujymdyq sharttardyń jumys istemeýi sebepteriniń biri bastaýysh kásipodaq uıymdarynyń álsizdigi men kásipodaq basshylarynyń jumys berýshige táýeldiliginde. Bastaýysh kásipodaq uıymdary tóraǵalarynyń 86% -y qoǵamdyq negizde jumys isteıdi. Kásipodaq uıashyqtary tóraǵalarynyń qaraqan basy úshin jumys berýshige degen shamadan tys adaldyǵy, ekonomıkalyq talaptardy qoıý kezinde qajetti tabandylyqpen, kásibılikpen jáne júıelilikpen teń áleýmettik dıalog júrgizýge jol bermeıdi. Sondyqtan jumyskerlerdiń quqyqtyq biliktiligin arttyrýymyz kerek»,-dedi QRKF tóraǵasy.
Kásipodaqtar federatsııasy jyl basynan beri múshelik uıymdarmen birge 159 oqytý semınarlaryn ótkizdi (onyń 133-i onlaın jáne 26-y offlaın semınarlar), olarǵa 6305 bastaýysh kásipodaq uıymdarynyń tóraǵalary, tehnıkalyq ınspektorlar jáne kásipodaq belsendileri qatysty.
«Kásipodaq ókilderi jumys berýshilermen teń dárejede kelissózder júrgizýge qabiletti bolýy tıis. Búgingi tańda azýly jumys berýshimen kelissóz júrgizý óte qıyn. Ol úshin sizder eldegi áleýmettik-ekonomıkalyq jaǵdaıdy da tereń túsine bilýlerińiz qajet»,-dep atap ótti QRKF tóraǵasy qatysýshylarǵa arnaǵan sózinde.
